يا قلبي اللي مثل بحرٍ تلاطم

وألا سواة الطير مرمي بمقلاع

عايش وهو محتاج طب ومراهم

رفرف بجنحانه من الموت في ساع

يا جوهرة تفرق ولا أنت كما هم

بين الجواهر بس تفرق بالاطباع

طلي على الدنيا تنور سماهم

فيك الغنج وعيونك ألوان ووساع

ياللي علت عنهم وعن مستواهم

يا مطمع الطماع في حب طماع

خالد عشق ويقول يا الله عساهم

ما ينكشف عشقي ولا يوم ينذاع

يكفيني اسمع ضحكتك عن لقاهم

وإذا سمعتك فز قلبي وينشاع

يفداك كل الناس ما أنت فداهم

ويفداك حتى خالد اللي لك انصاع

والقاعدة عندي يضيع التفاهم

لو تجرحك سكين في راس الاصباع

الله عطاني الحب والله عطاهم

وأنا قتيل الحب عاشق وملتاع

قلبي وروحي في عيونك دواهم

هذي الامانة حفظها خلف الأضلاع

قفلت باب الحب لكن ساهم

في عودتي للحب مجموعة أوجاع

أوجاع في داخل فؤادي تزاهم

فيها من الذكرى خيالات وإبداع