سعوی عرب کی سپریم کورٹ کی جانب سے رویت ہلال کے لیے تشکیل کردہ کمیٹیوں کی طرف سے سوموار کی شام ذی الحج کا چاند دیکھنے کی کوشش کی گئی مگر گذشتہ روز چاند نظر نہیں آیا، جس کے بعد اعلان کیا گیا کہ آج منگل کو سنہ 1438ھ کے ذی القعدہ کی 30 تاریخ ہو گی۔

خیال رہے کہ سپریم کورٹ کی قائم کردہ روئیت ہلال کمیٹیوں نے ملک بھر میں ذی الحج کا چاند دیکھنے کی کوشش کی تاہم کسی جگہ سے ذی الحج کا چاند نظر آنے کی تصدیق نہیں ہوسکی، جس کے بعد بدھ 23 اگست کو یکم ذی الحج کا اعلان کیا گیا ہے۔ اس طرح سعودی عرب سمیت دیگر خلیجی ممالک میں عیدالاضحیٰ یکم ستمبر کو منائی جائے گی۔

واضح رہے کہ پاکستان میں بھی ذی الحج کا چاند دیکھنے کے لیے مفتی منیب الرحمان کی سربراہی میں مرکزی رویت ہلال کمیٹی کا اجلاس آج بروز منگل کو کراچی میں ہو گا تاہم ماہرین فلکیات کا کہنا ہے کہ منگل کو چاند نظر آنے کے امکانات کم ہیں اور امکان ہے کہ یکم ذی الحج 24 اگست کو ہو گی جب کہ عید الاضحیٰ 2 ستمبر کو ہو گی۔ العرییہ اردو