أنت اكبر من الغني لا تشتكي يالفقير

لو نمت فوق الرصيف وما معاك اندما

خذ مني أكبر دليل يؤكد انك كبير

انت افترشت البسيطة والتحفت السما

أنا أحبك وأفاخر فيك ما دمت غير

وما رميت اذ رميت الله هو اللي رمى

فقير وثيابك الرثه طهاره وخير

ما شلت هم الثري واعجاب عذب اللما

نما رصيده من أمواله وعمره قصير

والا انت بالأجر والنيه رصيدك نما

تدري من اللي يعاني من فقر بالضمير

انسان عينه تشوفك بس قلبه عمى

الله خلقنا وسبحانه سميع وبصير

عبده من الخوف لا اذنب في ذراه احتمى

رحيم والرحمة عبادة بجبر الكسير

اللي لو تقول له وش فيك دمعه هما

مرمي ومنسي يمرونه وكنه أسير

السجن حاجة وللحاجة سجين ارتما

ماهو بصاحب سمو ولا معالي وزير

بسيط له حلم لأحلام الرعاه انتما

كذاب ياللي تقول الفقر ضيعة مصير

بحر الحقيقة على زيف السوالف زما

الفقر باب المعاناة القديم الشهير

ياما صنع نجم كان يدور حول الحما

الفقر صحرا ولكن القناعة غدير

كم من غني مات بالأطماع جوع وضما