كلها كم يوم وتنطبخ شربة رمضان وعلى فكرة شربة رمضان كلها فوائد خاصة إذا انشربت بعدما تفك ريقك بكم تمرة وكم سنبوسة، وأكيد لكل مدينة في مملكتنا الحبيبة طريقة في طبخ الشربة، لكن يا خسارة وألف خسارة على شربة الاتحاد اللي مو راضية تنطبخ كل ما يحاولوا إنهم يزبطوا مقاديرها يطلعلهم خازوق جديد، الإدارة والرئيس ونائب الرئيس وأعضاء الشرف كلهم صاروا شربة في شربة وساكتين وجالسين يتفرجوا على بعض ومحد راضي يشوف حل لحكاية هدا الشيخ الثمانيني، كل الأخبار اللي بنقراها في الجرايد بتقول إنه حسني عبدربه حيوقع للعميد لكن للأسف طلع الخبر كله شربة في شربة ووقع حسني عبدربه للنصر حتى عبده عطيف اللي استبشرت وفرحت فيه الجماهير الاتحادية لما لعب مع الفريق في البطوله الآسيوية شكلو كمان حيروح شربة والأخبار بتقول إنه كمان رايح يوقع للنصر وآخر الأخبار بتقول إنه كمان المدرب كانيدا حيترك الاتحاد لأنه شايف الحكاية كلها شربة في شربة، وهدا كله من تحت راس المشاكل والاتهامات اللي شغاله هادي الأيام ما بين كبار الاتحاديين، شي يزعل وشي يحزن هدا اللي جالس بيصير في عميد الأندية السعودية، من قبل ما يبدأ الموسم الرياضي وهو على طول مشاكل في مشاكل، مشاكل في عقود اللعيبة المحترفين المحليين أو مشاكل في عقود اللعيبة الأجانب، وطول الموسم وهوه بيشتكي من وجود ديون بملايين الريالات وطول الموسم بيشتكي من رئيس النادي اللي ما عنده هرجه رغم إنه أعضاء الشرف هما اللي اختاروه وهما اللي جلسوه على كرسي الرئاسة وكل واحد منهم دق على صدروا وقال «لا تخاف عمك جمل» ولمن خلص الدوري وطارت الطيور بأرزاقها بهدلوه وشرشحوه وردوا عليه بالفم المليان أساسا انت ما تفهم في الكورة ولا تعرف كيف تمشي النادي، وفي الأخير ما تسمع إلا صوت الجماهير الحزينة اللي مزعلها حال عميدها واللي تتمنى من كل قلبها انها تعيش لموسم واحد بس من غير مشاكل، أعضاء الشرف كل واحد منهم عايش في البرج العالي حقوو وكلما صار اجتماع شرفي يضمهم عشان يتبرعوا لناديهم أو يشوفوا حل لمشاكل وديون النادي تشوف كل واحد منهم جالس يهمز ويغمز ولسان حاله يقول نفسي نفسي، الين متى هدا الشح وهدا البخل يا أعضاء شرف الاتحاد عميدكم بينهار وانتو جالسين تتفرجوا عليه، صدقوني يا جماهير الاتحاد وصدقني يا عميد الأندية عندكم أعضاء شرف من أغنى أغنياء المملكة والخليج والوطن العربي لو اتبرعوا بس بالتفاريق ما حيكون حال الاتحاد بالشكل ده لكن وآآآآآه من لكن.. عشان كده بأردد مع جماهير الاتحاد نبغى رئيس كاش مو بكاش.
abofatoo@hotmail.com