دحين انت من ساعة ما مسكت الجريدة وانت جالس بس تكركر وتضحك من قلبك ياسيدي أقدر أفهم ليش كل دا الضحك والكركرة ؟، اسمعي التصريح دا ايش بيقول ؟ ايش بيقول ياسيدي ؟..
يقول لك ياستي انه وزير العمل المهندس عادل فقيه بيقول إن وزارته تدرس إمكانية رفع دعاوى ضد المتلاعبين بالتأشيرات والمتاجرين بها إلى هيئة التحقيق والادعاء العام والمطالبة بسجن المتلاعبين والمزورين للأوراق الرسمية. وقال «إن الوزارة ستبحث في طلبات التقديم لمن يرغب في الحصول على تأشيرات والتحقق منها والكشف عن المتلاعبين بها والمتاجرين بها، وسترفع دعاوى ضد من يزور في الأوراق الرسمية للحصول على التأشيرات بغرض التجارة بها» ، مضيفا أن الموضوع إذا وصل إلى ما يسمى بالإتجار بالبشر هناك آليات وأنظمة تحدد عقوبات قاسية لهؤلاء والجهة المعنية بها وزارة الداخلية .. وقبل لا أدخل في هرجة المقال أبغى أقول لحبايبنا اللي في وزارة العمل (صح النوم) فينكم من زمان دوبكم صحيتووا على موضوع الفيز والتأشيرات بعد ما أتملت البلد من كل الأجناس الصالح والطالح منهم وبعد ما صار أصحاب بيع الفيز والتأشيرات من أصحاب الملايين .. عشان كدا أتمنى من كل الحبايب انهم ما يزعلوا مني ومن كلامي لأن الله سبحانه وتعالى بيقول في كتابه الكريم (فأمشوا في مناكبها وكلوا من رزقه وإليه النشور ).. بس بالنظام مو بالتحايل والتزوير والنصب على عباد الله.. وتعالي دحين نحلل أنا وانتي الخبر حق وزارة العمل.. في البداية بيقول الخبر (تدرس) يعني لسه بتفكر ومعناها يا ستي على بال ما تدرس يبغالها سنين وسنين، ومعنى كلمة (إمكانية) يعني نجتمع ونشاور عقولنا يا فعلنا القرار والا تركناه زي غيرو من القرارات اللي بتتحفنا بيها دايما وزارة العمل .. يا وزارة العمل هوامير التأشيرات والفيز والاتجار بالبشر شغالين في البلد زي الحلاوة والطريقة حقتهم معروفة يفتحوا صوالين حلاقة أو بقالات أو أي نشاط وهمي بأوراق رسمية لكنها في الأساس عملية تزوير وتمويه عشان المعاملة تمشي ويستقدم المليح عمالة بالمئات والألوف وبعد كدا يشعتروهم في البلد ويتكسبوا من وراهم وعلى عينك يا تاجر .. والدليل على كلامي انك ما تمشي في شارع من شوارع جدة إلا والعمال الوافدين بالملايين سواء كانوا نظاميين أو غير نظاميين منتشرين في كل مكان وبيشتغلوا أي شي سواء كانت شغلتو أو غير شغلتو .. عشان كدا بأقول يا وزارة العمل التشهير التشهير لكل شخص باع ضميره وباع وطنه بوسخ دنيا.. وعيشوا كتييييير تشوفوا كتييييير.

abofatoo@hotmail.com