صباحكم صحة وخير وعافية، وصباحكم جميل مع عكاظ المتجددة دايما بوجود نخبة مميزة من الزملاء يمثلون فريق التطوير يقودهم ربان هذه الصحيفة ورئيس تحريرها الدكتور هاشم عبده هاشم أمده الله بالصحة والعافية وطول العمر واتمنى من كل قلبي انه هدا التطوير المتجدد دائما يعجب كل متابعي وقراء عكاظ في كل موقع من بلادي الحبيبة.. على مهلك ياسيدي وانت ماشي في الشارع جسمي اتفكفكت صواميلو من كتر الرجرجه، امشي على مهلي اكتر من كده انا رجولي يبغالها مزيتة المكاين عشان ادهن فيها مفاصلي من كتر ما امسك كلتش وفرامل وخايف كمان انه جالون الحليب اللي اشتريناه يصير جبنة من كتر الخضخضة، سيارتنا اتكسرت واتبهدلت واصحاب الورش صاروا من اصحاب الملايين وكلوا من تحت راس شوارع جدة واللي سببها اهمال مسؤول ومقاول ما يخاف الله والمصيبة لو جيت تبغى تعويض على اللي حصل لسيارتك يردوا عليك روح بلط البحر، الشوارع في جدة صارت ما تسر لا عدو ولا حبيب كل يوم والتاني وهما شغالين فيها لصمقة في لصمقة يسفلتوها ويرجعوا تاني يحفروها ومن حفرة لدحديرة وياقلبي لا تحزن وياخسارة ملايين الريالات اللي بتروح في سفلتة شوارع جدة. اشكال والوان من الحفر والمطبات اللي ما تخطر على بالكم وكلوا بسبب التحفير والترقيع هدا غير مويات المجاري والمياه الجوفية اللي بهدلت كل شوارع جده هدا غير انه مناقصات سفلتة الشوارع وراها هرجة ما يعلم فيها الا الله، والله ولد البلد يحزن لما يشوف بلدو مبهدلة هادي البهدلة والحبايب الدكاترة والمستشارين اللي ماسكين مشاريع سفلتة الشوارع ولا همهم بس تشوفهم داخلين اجتماع وخارجين من اجتماع والنتيجة بعد كده حفر ومطبات جديدة في جدة، بعدين هادول المسؤولين اللي ماسكين سفلتة الشوارع ما سافروا بره البلد ما شافوا كيف شوارع أي بلد عربي او اجنبي كيف متماسكه وقطعة وحده وعاجبهم حال شوارعنا اللي كل يوم والتاني وهيه بتتحفر اخر تحفير، بس السؤال اللي يدردب نفسه فين هيئة مكافحة الفساد عن هادي البلاوي والمصايب اللي جالسة بتصير في شوارع جدة؟ فين بتروح الميزانيات اللي بتعتمد عشان سفلتة الشوارع؟ ليش ما تحاسبهم على ملايين الريالات اللي بتصرف على اسفلت من اعفن انواع الاسفلتات اللي بستخدمها شركات المقاولات في شوارعنا؟ يا ناس يا هوه جده مو ناقصة واللي فيها يكفيها وعيشوا كتيييير تشوفوا كتييييير.
هرجة: سفلتة الشوارع لعبة لسحب الملايين.


للتواصل أرسل sms إلى 88548
الاتصالات ,636250 موبايلي, 737701
زين تبدأ بالرمز 136 مسافة ثم الرسالة

abofatoo@hotmail.com