ايش دا اللي جايبو معاك يا سيدي بس 3 حبات بيض وانا قلت لك جيب طبق ؟.. طبق مرة وحدة أما انتي مفترية، الطبق يا ستي صار بـ 17 ريال والله عالم بكرة بكم حيكون؟، وليه كدا يا سيدي صار طبق البيض غالي ؟، والله ياستي هدا السؤال ممكن تجاوبك عليه وزارة التجارة وممكن كمان تجاوبك عليه جمعية دمار المستهلك قصدي حماية المستهلك، ماعلينا روحي أقلي الـ 3 بيضات دي وخلينا نتعشى وزي ما قالوا أهل أول غني مات فقير مات وكل واحد وعمله .. وشوية أسمع أم فتو بتقول لي ايش حكاية هادول المتسللين اللي سيرتهم على كل لسان في البلد؟، هادول ياستي مجموعة كبيرة من الرجال والحريم شاردين من بلدهم بسبب الظروف المعيشية اللي بيعيوشوها ومتسللين على بلدنا بأعداد كبيرة وفي غيرهم كتييير ومن جنسيات عربية، وهادول المتسللين والمتخلفين ما دخلوا البلد إلا لما لقيوا ضعاف النفوس اللي بيهربوهم لداخل البلد بعد ما يكونوا استلموا المعلوم منهم، وغير كدا انه في بعض المواطنين الله يهديهم ويصلحهم ويسامحهم بيشغلوهم عندهم في مزارعهم والا في تربية مواشيهم عشان كدا البلد مليانة من هادول المتسللين والمتخلفين، هدا غير اللي بيجوا للحج أو للعمرة ويتسمروا في البلد وبرضوا لقيوا مواطنين ضعاف نفوس بيسكنوهم ويشغلوهم والدليل وجودهم في كل شارع وحي وزقاق وبأعداد مهوولة وتلاقيهم بيشتغلوا أي حاجة، هدا غير انه في منهم فئة بتمارس الإجرام وبتبيع المخدرات والأسلحة والمشروبات الكحولية وينتشر بينهم الرذيلة، عشان كدا لازم المواطن يكون غيور على بلده ولا يسمح لهادول المتسللين والمتخلفين انهم يدخلوا البلد لانه ضررهم أكتر من نفعهم. ويارب أسألك باسمك الكريم أن تحمي بلدنا من كيد المتسللين والمتخلفين والمجرمين إنك على كل شيء قدير.. وعيشوا كتييييير تشوفوا كتيييييير.
للتواصل أرسل sms إلى 88548 الاتصالات ,636250
موبايلي, 737701 زين تبدأ بالرمز 150 مسافة ثم الرسالة
abofatoo@hotmail.com