• أسبوع الإجازة اللي اعتمدتو وزارة التربية والتعليم كان أسبوع مييت ومالوو داعي بالمرررة، ويكون في علمكم هوه مو أسبوع هوه أسبوعين بالتمام والكمال لأنه أغلب المدارس أجزت قبل الإجازة الرسمية بأسبوع والبركة في بعض المديرين والمعلمين والمعلمات اللي كانوا زابطين الأمبير على رحلات دبي وغيرها من الدول الداخلية أو الخارجية لكن المصيبة مو هنا المصيبة انه حيكون برضوو في أسبوع تالت حياخدوه الطلاب والطالبات يسموه أسبوع تزبيط الأمبيير وتزبيط الأمبير دا معناه تزبيط وقت النوم لانه بعض الخبراء والاستشاريين الكبار في علم النفس والاجتماع بيقولوا ويتكلموا انه الساعة البيلوجية مدري النيتروجية يبغالها تترستك مع الآدمي عشان يزبط وقت نوموو ، وشوفوا عاد الطلاب والطالبات بالهم طوويل ومتى حيزبط أمبيير نومهم. يعني بالبلدي كدا ياحبايب يبغالهم أسبوع ميييت كمان وسلمولي على الإجازة اللي ماكان لها داعي لانه ما جاء من وراها إلا شعترة أمبيير النوم وأغلب البيوت انقلب كيانها فوقاني تحتاني لانه ماشاء الله تبارك الله طلابنا وطالباتنا بسلامتهم اشتغلوا (عسس) بس من غير صفيرة لانه صفيرتهم كانت عبارة عن خرجات وأسواق ومولات وكباين وكافيهات وسهر للصبح وبعد كدا نوووم لبعد المغرب والله يهدي ما خلق وكل مين بعقله يعيش، لكن السؤال اللي يدردب ويسدح نفسه وأبغى إجابته من حبايبنا اللي في وزارة التربية والتعليم بيقول ايش اللي يمنع انه نربط إجازة الأسبوع دا مع إجازة نهاية السنة ؟..
• في لوحة من كتر ماهي مسنترة ومتسمرة من أكتر من تلاته سنوات (صدت) واللوحة هادي مكتوب فيها بالبنط العريض وبيشوفها الرايح والجي والصاحي والنايم ومكتوب فيها ( مشروع تطوير وتحسين ممر المشاة بحي الجامعة ) ومن يومها ما شفنا لا تطوير ولا تحسين ولا ممر كل اللي نشوفه مصدات خرسانية في الشارع وقلابات وتركترات تشيل التراب من اليمين للشمال ومن الشمال لليمين. أكتر من تلاته سنوات يا أمانة جدة وهدا المشروع لسه ما خلص ياهووه خافوا الله في التلاته السنوات هادي تصير مشاريع ومشاريع ليش ساكتين عن دا المشروع ومين هوه دا المقاول اللي ساكتين عنه وما بتحاسبوه على إهماله والا الحكاية فيها (إن) والتأخير منكم انتوا يا أمانة جدة فهمونا لجل الله، أكتر من تلاته سنوات وسكان الحي طفشوا وجاهم الهم والغم وهما بيشوفوا المشروع تراب في تراب ولسه ما انتهى وهما اللي انبسطوا وفرحوا وقالوا خلاص أهلنا وأولادنا حيخرجوا يتمشوا وحيصيروا زي بقية خلق الله اللي عندهم ممشى يتمشوا فيه.
يا أمانة جدة جبتولي الضغط والسكر وفقعتوا قلبي ومرارتي، وعشان كدا بقول دخيلكم ولجل الله خلصونا من المشروع هدا وفرحوا أهل الحي وبلاشي من التأخير اللي مالووو داعي.. وعيشوا كتيييييير تشوفوا كتيييييير..
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة