دحين أنا أبغى أفهم انت جايب هادول القرود معاك ليه ؟ هادي القرود الأربعة ياستي حناخدها معانا انتي حتاخدي قردين وتدخلي مدرسة البنات وأنا حاخد برضو قردين وأدخل مدرسة الأولاد عشان تشوف القرود شغلها وتفلل رؤوس البنات والأولاد .. انت بعقلك ياسيدي والا قاعد تتريق ؟! أنا لا بتريق ولا شي وهدا العنوان قدامك مكتوب بالخط العريض واتنشر قبل أسبوعين في إحدى الصحف (البحث عن القمل في مدارس بقلم رصاص) ، يعني بالبلدي إدارة التربية والتعليم قامت بحملة تفتيش على مدارس الأولاد والبنات والحبايب من المفتشين والمفتشات ما قصروا وهاتك يا تفتيش وتفغيص للقمل بالمرسام وعلى راس الطلاب والطالبات الين ما تقرحت وتجرحت رؤوسهم من كتر تفغيص القمل هدا غير انهم دخلوا الطلاب والطالبات في حالة نفسية سيئة وياريتهم اكتفوا بكدا إلا قاموا بتسجيل أسماء الطلاب والطالبات اللي عندهم قمل وشوف بعد كدا التريقة عليهم حتى انه بعض الطلاب والطالبات بطلوا يروحوا المدارس بسبب حالتهم النفسية السيئة وبسبب التريقة اللي بيسمعوها كل يوم من زملاءهم من الطلاب والطالبات (يا مقمل .. يا مقملة ) والمصيبة الكبيرة انه حبايبنا حقون حملة التفتيش بعد ما خلصوا من تفتيشهم ما كلفوا نفسهم انهم يعطوهم نصايح أو يحولوهم على مستشفيات أو يعطوهم أدوية عشان يتخلصوا من القمل والقشرة، وبعدين هدا الكلام ممكن يحصل قبل 50 سنه أو 70 سنة لمن كانت الرؤوس كلها مقملة يعني ماكان في لا شامبوهات ولا أدوية للقمل والقشرة لكن في الزمن دا كل أنواع الشامبوهات والمستحضرات الطبية اللي بتقضي على القمل والقشرة موجودة في كل الصيدليات والبيوت مليانة من هادي المستحضرات الطبية والشامبوهات، ياخسارة كنت أتمنى من المفتشات والمفتشين انهم يهتموا بعلوم العصر اللي بيستفيد منها الطالب والطالبة، كنت أتمنى انهم يهتموا بتطوير مناهج جديدة تكون قريبة من عقولهم بدل هادي المناهج اللي يبغالها واحد خبير عشان يعرف يفك ألغازها ( طلاب وطالبات الابتدائية لا بيعرفوا يقروا ولا يكتبوا وكله من تحت راس دا اللي يسموه تقويم ) كنت أتمنى انهم يهتموا بصحتهم وصحة ظهورهم ويعطوا لكل طالب لاب توب وسيدي منسوخ فيه كل المواد الدراسية بدل هادي الشنطة والكتب اللي وزنها أكبر من وزنهم واللي بسببها تكسرت ظهورهم وسببت لأغلبهم انحناءات في ظهورهم، كنت أتمنى انهم يهتموا بالمقاصف المدرسية اللي جالسة بتبيع كل شي ضار بصحة طلابنا وطالباتنا، كنت أتمنى انهم يهتموا بعقولهم بدل الاهتمام بالقمل والقشرة واللي ما جاء منها إلا حالات نفسية لهم والتعب والهم والغم لآباء وأمهات الطلاب والطالبات .. وعيشوا كتيييييير تشوفوا كتيييييير.
للتواصل أرسل sms إلى 88548 الاتصالات ,636250
موبايلي, 737701 زين تبدأ بالرمز 150 مسافة ثم الرسالة

abofatoo@hotmail.com