صديقي وزميل دراستي في مدرسة عبدالله بن عباس الابتدائية حسن ناصر بركات باناصر بيقولي ليه ما تكتب عن تميس زمااان يافتحي، ياحسن ياحبيب قلبي هوه بس التميس اللي كان حلو زمان كل شي كان على ايامي وايامك حلو حتى النفوس كانت حلوه انت قول بس الله يخارجنا من هادي الدنيا على خير ويعطينا خيرها ويكفينا شرها، في صفحة يوم الاربعاء بتاريخ 21/6/1434 نشر الزميل محسن الحازمي تحقيق صحفي جميل وفي نفس الوقت خطير وكان عنوان التحقيق ((الموت في عبور الشرايين السريعة)) وكان مضمون التحقيق بيقول انه بعض الشوارع الجديدة والسريعه محتاجه للكباري الخشب عشان الاوادم تعرف تمشي وتعدي بدل ما تلاقي نفسها مصدومه ومدعوسه من اصحاب السيارات اللي بيمشوا في هادي الشوارع زي الصواريخ هدا غير انه في تاريخ 5/11/1433 حبيبكم الفقير الى الله ابو فتو كتب مقال بعنوان ((كباري للمشاة يا أمانة جدة)) وما بين تحقيق الزميل محسن الحازمي وبين مقالي ايام وشهور ومازال الحال زي ما هوه سكتم بكتم والامانه اذن من طين واذن من عجين والاوادم الغلابا اللي بيعدوا ويمشوا من هادي الشوارع السريعه كل يوم والتاني وهما حاطين اياديهم على قلوبهم لا يجي صاحب سياره يلقط واحد منهم بسبب سرعتوو الجنونية وعشان كده ارجع واقول انه كل مواطن في جده بيشكر كل المسؤولين في امانه جده على كل هادي المشاريع الجديده اللي بنشوفها في شوارعنا بس زي ما بيقولوا الزين ما يكمل، هادي المشاريع الجديده في الشوارع السريعة يا امانة جدة محتاجة لأنفاق وكباري خشب عشان نحمي كل اللي يمشي فيها من الموت يعني بالبلدي كده شارع الاندلس محتاج لكوبري خشب وشارع السبعين محتاج لكوبري خشب وانتو عارفين انه شارع السبعين بيوصل اليين المطار عشان كده محتاج اكتر من كوبري خشب وشارع فلسطين برضو محتاج لكوبري خشب حتى الخط السريع اللي بيربط مابين جدة ومكه والمدينة برضو محتاج لكوبري خشب وبعدين السؤال الكبير واللي محتاج له اجابه مقنعه مين يتحمل ديات هادول الغلابا اللي بيموتوا من تحت هادي الشوارع السريعه يا امانة جدة يعني عرفتوا تحسبوا حساب السيارات وحياة الاوادم مالها قيمة عندك يا أمانة، والسؤال التاني واللي بيسدح نفسوو كمان واللي يبغالوا اجابه شافيه كافية هادي الشركات الكبيرة اللي اخدت الملايين واللي سوت هادي المشاريع مافكرت مجرد تفكير انها تسوي كباري خشب او انفاق تحت هادي الكباري عشان الغلابا من الناس تعرف تعدي منها بسلام عشان كده بقول يا مسؤولين يا أصحاب القرار في امانة جدة لازم يكون فيه كباري خشب وانفاق للمشاة في هادي الشوارع السريعة عشان الناس والطلاب والطالبات يعرفوا يقطعوا ويمشوا في هادي الشوارع براحة وطمأنينة ونحميهم ونحمي حياتهم من بعض أصحاب السيارت اللي ما يهمهم إلا كيف الواحد منهم يصفي الطبلون بسرعتوا الجنونية.. وعيشوا كتيييييير تشوفوا كتيييييير.

للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة

abofatoo@hotmail.com