غريبة اليوم داخل البيت فرحان ومصهلل ايش الحكاية يا سيدي؟ امسكي الورقة دي واعطيني رأيك فيها.. وشوية اسمع الحرمة لولولولولولولولي مبرووك يا سيدي أخيرا أعطوكم إجازة يومين.. الله يبارك فيكي أخيرا أعطونا إجازة يومين بعد 25 سنة كرف وتعب من يوم الخميس، أخيرا صرنا زي الأوادم والناس الحمد لله على كل حال.. بس برضو شكلك زعلان ومتضايق يا سيدي! زعلان ومتضايق من هدا الإهمال اللي جالس بيصير من حكاية انقطاع الموية في مكة المكرمة! وانت ايش عرفك انه الموية مقطوعة في مكة؟ كيف ايش عرفني والجريدة بتقول (عطل جديد يضاعف أزمة المياه في مكة) وهدا العطل يا ستي تسبب في نقص الكمية اللي بتتوزع لمكة من 520 ألف متر مكعب إلى 190 ألف متر مكعب يعني نقص كبيير في الموية، وهدا خبر تاني في الجريدة بيقول (زحام ومضاربات في أشياب مكة وقوائم الانتظار تصل لـ3000 طلب)، وهدا خبر تاني كمان كان مكتوب في جريدة عكاظ بيقول (طوابير الانتظار تكتم الأشياب والعطش يستمر 10 أيام)، وبعدين أنا ما بجيب كلام من راسي ولا بتبلى على أحد كل الجرايد بتهرج، هدا غير الاتصالات اللي بتجيني من بعض الحبايب في مكة وكلهم بيشتكوا من انقطاع الموية عنهم لأكتر من أسبوعين، هيا بالله كيف حيتصرفوا أهل البيوت والموية مقطوعة عنهم بالشكل دا ونحنا في أيام الصيف ودرجة الحرارة واصلة لـ50 درجة هدا غير الرطوبة واللسلسة هيا بالله عليكي كيف حيتروشوا وكيف حيتوضوا وكيف حيغسلوا ملابسهم ومواعين مطابخهم، مضاربات وزحام أيام وليالي والناس ماسكة سرا في الاشياب عشان تحصل على وايت واحد وبعدين المفروض انه أول ما تحصل مشكلة في توزيع المياه لأي منطقة يكونوا الحبايب حقون الطوارئ جاهزين بعدتهم وعتادهم مو يبهدلوا الناس بالشكل دا عشان تنحل المشكلة اللي هما السبب فيها والمفروض كمان انه يكون في صيانة يومية على كل مواصير إمدادات المياه لأي منطقة من مملكتنا الحبيبة عشان بعد كدا لا نشكي ولا نبكي، عشان كدا بقول يا شركة المياه دخيلكم وأبوس راسكم خلوا بالكم من انقطاع الموية خاصة في أيام الصيف وانتو عارفين ايش معنى الصيف يعني حر ورطوبة وعرق وحالة ما يعلم بها إلا الله.. وارحموا من في الأرض يرحمكم من في السماء، وانتو يا أهل مكة يا ناسي وتاج راسي الله يعينكم.. وعيشوا كتيييييير تشوفوا كتيييييير.