كل سنة وانتوا بخير وصحة وسلامة ورمضان كريم، اليوم حتكون آخر جمعة في شعبان وبعدها بتلاتة أو أربعة أيام حسب شوفة الهلال حيجينا ضيف عزيز وغالي على كل مسلم، ضيف اسمه شهر رمضان الكريم شهر العبادة وشهر قراءة القرآن وشهر صلاة التراويح وصلاة التهجد شهر الخيرات وشهر البركات والحسنات، يا الله كلها غمضة عين مابين رمضان اللي راح ورمضان اللي حيجينا بعد كم يوم سنة عدت زي الهوا وكله من أعمارنا وكل بني آدم وعمله اسأل الله سبحانة وتعالى أن يبارك في أعمارنا وأعمالنا وأن يبلغنا شهر رمضان ونحنا وانتو في صحة وعافية واسأل الله سبحانه وتعالى أن تكون كل القلوب والنفوس متحابة في بيوت أهلنا وعوائلنا وحبايبنا وجيراننا لانه والله ياحبايب الدنيا دي زايلة والبني آدم ما ياخد منها إلا الكلمة الطيبة والمعاملة الحسنة وسامحوني طولت عليكم.. أسيبكم مع مقالي حق اليوم، ياسلام على أيام وليالي رمضان، أيام كلها خير وعبادة، بعض الناس من يوم ما يدخل الشهر الفضيل ومن أول أيامه تلاقيه مجتهد ونشيط بيصلي الصلوات في المسجد وتلاقيه في أول الصفوف وبعد عشره أيام بس تلاقي أخينا (تنح) وما يقدر يتزحزح من مكانه، تلاقيه يفطر الييين ما (ينبشم) عشان كدا بقول ياحبايب إن المعدة بيت الداء، على مهلكم في الفطور وانتو عارفين إنه وراكم صلاة مغرب وعشاء وتراويح، هدا غير المدخنين منهم، تلاقيه أول ما يخلص من فطوره أو يمكن كمان بعد ما ياكل التمرة تلاقيه ولع سيجارة وهات يا شفط ونفخ فيها، تلاقي أخينا جسموو اتخدر من البلا اللي شفطووا، صدقووني يامدخنين ويا مدخنات إنها فرصة كبيرة ما تتعوض حاولوا في هدا الشهر الفضيل إنكم تبعدوا عن التدخين وحافظوا على قلوبكم وصدوركم من هدا السم اللي بهدلكم وبهدل كيانكم وجبلكم الطفر في جيوبكم، هدا غير زحمة الفول وما أدراك ما الفول، تشوف الزحام والغشنة والمشكلات والمضاربات كأنهم ما بياكلووا فول إلا في رمضان، ايش فيها لما أشتري فول حق كم يوم ويتسخن في البيت بدل هادي البهدلة ووجع الراس، هدا غير انه في ناس ما يحلا لها انها تشتري أغراضها إلا قبل المغرب وتلاقي أخينا يشتري أشكال وأصناف كتييرة من الأكل ولما يفطر ما يتاكل من هدا كله ولا شي. عشان كدا نصيحتي للحبايب لا تحاولوا انكم تشتروا شي قبل المغرب لأنه البني آدم سبحان الله يحس داك الوقت انه جيعان ويبغى ياكل أي شي .. هدا غير ستات البيت تلاقيها من بعد صلاة الظهر الين ما يأذن المغرب وهيه متسمرة في المطبخ وما تسمع إلا قربعة القدور وزبادي التطلي والماسية والسقودانة هدا القدر على النار ودي الصينية جووة الفرن وقمر الدين في الخلاط، تلاقي المطبخ انقلب حراج وتشوف السفرة مليانة أصناف وأشكال من الأكل وياريتوو يتاكل، لا والمصيبة الكبيرة انها لما تسمع أذان المغرب تلاقيها تزعق من جوة المطبخ وتزهم يابنات أعطوني تمرة خلوووني أفطر، هدا غير بعض أو أغلب العوايل بعد الفطور يتقنبروا قدام شاشة التلفزيون عشان يشوفوا التفاهات اللي بتعرضها فضائياتنا العربية للأسف .. عشان كدا بقول ياناس ياهووه والله رمضان مو كدا، رمضان شهر عبادة وصلاة لكن ايش أقول.. الله يهدي ما خلق.. وكل مين بعقله يعيش.. وعيشوا كتييير تشوفوا كتيييير.