• ايش هدا اللي جايبوو معاك ياسيدي مصايد فيران وغراء فيران ليش ده كله ؟ تسأليني انا ليش ده كله روحي اسألي الحبايب اللي في امانة جدة ليش وعشان ايش جايب ده كله .. جايب المصايد وعلب غراء الفيران دي كلها عشان اوزعها لسكان العماير اللي جنبنا لانه اصواتنا انبحت وحلوقنا انشقرت ونحنا بنتكلم نطالب الامانة انها تشوف حل لحكاية هادي الفيران اللي انتشرت انتشار يخوف في كل حي وفي كل شارع وفي كل زقاق سواء كانت احياء قديمة او جديدة ، تعبنا ونحنا نطالب ونتكلم ونهرج عشان الحبايب اللي في الامانة يشوفوا حل لهادي المصيبة اللي هلكت وبهدلت اغلب سكان جدة لكن للاسف لا حياة لمن تنادي، امانة جدة سكتم بكتم لا ارى لا اسمع لا اتكلم والفيران مو مقصرة جالسة بتتوالد وتتكاثر بالملاييين وجالسة تنخر في كل شارع وفي كل مبنى وفي كل عمارة على كيفها وامانة جدة في المدرج تتفرج ياحبايبنا يللي في امانة جدة شوفوا حل للمصيبة دي قبل لا ينتشر المرض والوباء في البلد وتجي الفاس في الراس ويروحوا سكان جدة فطيس والسبب سكوتكم واهمالكم وانتو ادرى وابخص..
• مشروع ممشى الجامعة اللي لوحته صدت وهيه معلقة هدا المشروع له اكتر من تلاته سنوات ما صار فيه ولا شي، ياريتكم ما كسرتوه ولا حفرتوه وتركتوه زي ما هوه لما كان العشب الاخضر فيه وكانوا سكان الحي ينبسطوا فيه لكن للاسف كل اللي صار فيه وبنشوفه لما نمشي من جنبه انه الشيولات والدركترات اللي هناك بتحفر وتشيل التراب في الصباح من الجنب اليمين للجنب الشمال وفي الليل بترجعوا تاني من الشمال لليمين وعلى كده طول ايام السنة ، معقولة اكتر من تلاته سنوات يا أمانة جدة وهدا المشروع لسه ما خلص ياهووه خافوا الله في التلاته السنوات هادي تصير مشاريـع ومشاريـع ليش ساكتين عن دا المشروع ومين هوه دا المقاول اللي ساكتين عنه وما بتحاسبوه على إهماله والا الحكاية فيها (إن) والتأخير منكم انتوا ، يا أمانة جدة فهمونا لجل الله، أكتر من تلاته سنوات وسكان الحي طفشوا وجاهم الهم والغم وهما بيشوفوا المشروع تراب في تراب ولسه ما انتهى وهما اللي انبسطوا وفرحوا وقالوا خلاص أهلنا وأولادنا حيخرجوا يتمشوا وحيصيروا زي بقية خلق الله اللي عندهم ممشى يتمشوا ويحركوا جسمهم فيه ، يا امانة جدة شوفوا لها حل وارحموا الناس من غبارها اللي بهدلهم وجاهم مرض الربو بسبب غبارها اللي بيتبخروا فيه نهار وليل وارحموا من في الارض يرحمكم من في السماء وعيشوا كتيييييير تشوفوا كتيييييير.