كل عام وانتوو بخير وصحة وسلامة يا حبايب بعد الزحمة.. قبل كم يوم كان في خبر كده فور دمي ورفع عندي السكر والضغط، خليكم معايا وانتوو تعرفوا الهرجة، دحين انت يا سيدي متى حتاخد تقاعد؟ فال الله ولا فالك واسكتي لحد يسمعك قال تقاعد قال، نحنا لسه على راس العمل وجالسين بنقول (يا يدي فكي حلقي) من كتر المصاريف والإيجارات، فما بالك بالمتقاعد الغلبان اللي على قد حاله وفوق كل ده تبغيني آخد تقاعد عشان الحبايب حقون التقاعد ياخدوا اللي ورايا واللي قدامي وما يعطونا إلا الفتات، خلينا كده عايشين مبحبحين ومستوريين ويبعد عننا التقاعد ومؤسسته. طيب يا سيدي الحبايب اللي في مجلس الشورى ليش ما يقدموا توصيات برفع رواتب المتقاعدين ويرفعوها للمقام السامي عشان يعتمدها، أهاا جيتي على الجرح يا ستي هيا اسمعي ايش حصل قبل كم يوم في مجلس الشورى وكتبت عنه الصحافة: واحد من الأعضاء الطيبين اللي في مجلس الشورى اسمه خالد العقيل قال لحبايبه اللي في المجلس وبيحاول قد ما يقدر انه يقنعهم ويستعطف قلوبهم ويوقفوا معاه بخصوص التوصية اللي رفعها لهم، وقال لهم بالفم المليان: (إن أردتم أن تكونوا صوت من لا صوت له، عليكم النظر في أحوال هذه الفئة التي لا تطلب الناس إلحافا، بل عدم إحراج كرامتها في إبراز الإثباتات في مكاتب الضمان الاجتماعي، جعل الله ذلك في موازين حسناتكم)!. طبعا هدا الكلام ما عجب بعض الأعضاء وجلسوا يتوايقوا بعيونهم لأنه كلام زميلهم ما عجبهم واعتبروه كلام عاطفي وما له مكان لا في قلوبهم، يعني كان ردهم بالبلدي كده ما يصير انه نرحم ونعطف على المتقاعدين اللي خدموا بلدهم بدمهم وقلبهم، يا أعضاء مجلس الشورى في متقاعدين في البلد بيستلموا رواتب مخجله الواحد يستحي ويخجل انه يقول عنها انها رواتب، يا أعضاء مجلس الشورى استثمارات المؤسسة العامة للتقاعد بالمليارات وزعوا عليهم التفاريق طالما انها رواتبهم وتستثمر، يا أعضاء مجلس الشورى ما يكفي المتقاعد انه بيتقاعد من غير مكافأة نهاية خدمة بعد خدمة أكثر من 30 سنة، يا أعضاء مجلس الشورى رواتب بعض المتقاعدين ما تكفيهم عشان يعيشوا حياة كريمة في بلدهم اللي خدموه بدمهم وقلبهم، يا مجلس الشورى ارحموا من في الأرض يرحمكم من في السماء، وانت يا متقاعد الله يعينك ويساعدك بعد رفض وزارة المالية ورفض المؤسسة العامة للتقاعد برفع الرواتب جاك الرفض من مجلس الشورى، لكن الواحد ايش يقول إلا عيشوا كتييييير تشوفوا كتييييير.
مثل حجازي: الشبعان ما يفت للجيعان.