الحوار اللي سواه زميلنا وحبيبنا حسين الشريف مع الدكتور عبدالله البرقان رئيس لجنة الاحتراف كان حوار جميل وجاء في وقته عشان يقول لرؤساء الأندية ووكلاء اللاعبين (ستوب) وقفوا عند حدكم وفكونا من حراج العصر ده اللي بنسمع ونقرأ عنه في صحافتنا الرياضية كل بعد فترة وفترة على لعيبة ما يستاهلوا هادي الملايين وتراكم خبصتوها وزودتوها بمزايداتكم على لعيبة محترفين ما يسووا في سوق الاحتراف المحلي إلا مليون ريال في السنة وهدا الكلام صرح فيه قبل فترة الدكتور صالح بن ناصر وقال بعظمة لسانه اللاعب السعودي قيمته مليون ريال في السنة وإن زاد على كده فالحكاية فيها (إن) وأخواتها وجيرانها. حتى ثعلب الكورة السعودية والخبير والمدرب الوطني أمين دابو قال نفس الكلام في الحوار اللي نشر في هادي الجريدة. والحق والصراحة يا لعيبتنا المحترفين ما تزعل اتخن واثقل واحد فيكم هادي قيمته في السوق المحلي ومازاد على كده فحتكون الحكاية امسكلي واقطعلك والشواهد كتيييرة على ده الكلام وما خفي كان أعظم. نرجع للاعب السعودي المحترف ونسأله سؤال ونبغى الإجابة منه. انت ايش قدمت لناديك أو للمنتخب عشان ادفع لك مبلغ 5 ملايين أو ستة ملايين في السنة ايش المردود اللي حيجيني منك لما ادفعلك خلال خمس سنوات 25 مليون أو 30 مليون ريال تدري مين حيجاوبك على ده السؤال حيجاوبك على السؤال ده المحترف الأجنبي اللى بيدخل لخزينة ناديه ملايين الدولارات من الإعلانات لكن انت ايش حاخد منك؟ تدري ايش حاخد منك. حاخد منك سهر في الليل ونوم في الصباح وساعتين زمان تطقطق فيها بالكورة وفي الأخير قالوا عنك محترف وتبغى 30 مليون ريال لا ويتشرط كمان الأخ حتدفعوا والا في غيركم يبغاني وحيدفع وشر البلية ما يضحك والمصيبة انه في منهم ما يعرف من الكورة الا اسمها هدا غير اخلاقه السيئة لما تشوفه يلعب مباريات في الدوري، للأسف وهادي هيه الحقيقة في لعيبه كورة عندنا حرام فيهم هادي الملايين وحرام فيهم كلمة احتراف لكن زي ما بيقولوا الدنيا حظوظ عشان كده بقول لكل اللعيبة المحترفين من حراس ومدافعين ومهاجمين واحتياطيين نحترمكم ونقدركم ونحبكم لكن إمكانياتكم الكروية والمهارية والفنية ما تأهلكم انكم توقعوا عقود احتراف بهادي الملايين المبالغ فيها واسألوا نفسكم قبل ما تسألوا غيركم معقولة انتو تستاهلوا هادي الملايين؟ وقبل ما ادردب وأمشي أقولكم مبروك عليكم دخولكم في مشروع التأمينات الاجتماعية وعيشوا كتيييير تشوفوا كتييييير.