- سيمفونية ولحن وطرب جميل قدموه لعيبة فرقة الرعب بفوزهم على لخويا القطري بتلاته اهداف نظيفة بعد ما اعتمد الفريق الأهلاوي على الكرات القصيرة والبينية اللي ارهقت وشتت عمق واطراف الفريق القطري اللي بيلعب فيه اكتر من محترف اجنبي، وعشان لا نبخس حق الفريق القطري نقول كمان انه الفريق القطري قدم مباراة جميلة وهدد مرمى الاهلي كتيير وضاعت عليه فرص بالكوم لو ركبت في الباب كان حيكون للمباراة كلام تاني لكن الحمد لله لعيبة الاهلي ما قصروا ولعبوا مباراة كبيرة واستحقوا الفوز واستاهلوا التأهل عن مجموعتهم وباقيلهم مباراة مع سبهان الايراني وحيكون لهم كلمتهم ان شاء الله وحيتصدروا مجموعتهم بفارق النقاط والاهداف.
- الزعيم الهلالي كمان قدم مباراة جميلة وسيطر سيطرة كاملة على المباراة رغم انه المباراة على ملعب بيروزي وبين جمهورو اللي وصل عددهم لـ 75 الف متفرج لكن لعيبة الهلال ما قصروا وكانوا كلهم نجوم وبالذات البطل عبداللطيف الغنام اللي قطع الموية والكهرباء على لعيبة بيروزي الايراني وبفوز الهلال تصدر مجموعته الرابعة.
- سالم الدوسري لاعب موهوب وصاحب امكانيات فنية رائعة يحتاج مدرب كبير يعرف كيف يوجهه ومتى يتمركز ومتى يستخدم مهاراته ومتى يباصي الكورة ومتى يسدد، تذكروا اسمه وصدقوني حيكون نجم من نجوم الكرة السعودية خاصة انه لسه صغير في السن بس اهم شي يطور نفسه ويبعد عن الغرور.
- العميد الاتحادي لعب مباراة كبيرة قدام باختاكور الاوزبكي وكانوا كل لعيبة الاتحاد نجوم بعد ما حط كانيدا التكتيك الفني الممتاز عشان يضمن الفوز ويكون المتصدر للمجموعة وهدا الشي مو غريب على الاتحاد لأنه بطولة آسيا لعبتو ويعرف أسرارها.
- فريق الفتح من الفرق اللي يطربني لعبو، فريق متجانس في كل الخطوط وامكانيات لعيبتو الفنية والمهارية ممتازة ومدربهم من المدربين الرائعين أعطى لعيبتو الخطة الفنية اللي خلتهم يفوزوا على الاتفاق رايح جاي وبكده حيقابلوا النصر في دور الاربعة ويا خوفي على النصر من الفتح وعمايلووو.
- كتييير من الكتاب والمحللين والنقاد الرياضيين وحتى الحكام الدوليين المعتزلين اتكلموا في حكاية بلنتي نايف هزازي وقالوا إشبو الحكم الدولي عبدالرحمن العمري هوه نسي الكروت في البيت والا نسي ما يذاكر ايش بيقول القانون في الحكاية دي، على العموم حصل اللي حصل وراح الاتحاد فطيس وكله من تحت راس الدولي العمري وأنا ما عندي كلام اقولو في الحكاية دي إلا عيشوا كتييييير تشوفوا كتيييييير

abofatoo@hotmail.com

للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة