فازت الإمارات بكأس الخليج ومبروك عليها اللقب لأنه منتخب جديد اختاروه المسؤولين عن الرياضة في الإمارات بكل حرفنة فنية وتكتيكية وكان أغلب اللعيبة فيه من الشباب ما عدا المعتق (مطر ) اللي كان وجوده في تشكيلة منتخب الإمارات كمدرب ثاني والدليل على كلامي انه ما لعب إلا كم دقيقة ينعدو بالأصابع كتكريم له لا أقل ولا أكثر، مو زي لعيبتنا لو ما اختاروهم تقرأ تصاريحهم تاني يوم في الصحافة ويقولوا المدرب دا مغفل ما يفهم، ما علينا كل مين بعقله يعيش .. ودحين خلونا نشوف ايش بتقول هرجتنا حق اليوم. خد ياسيدي هادي ورقة جاتك على الفاكس وشكلو كدا صاحبها زعلان ومتضايق وهوه جالس بيكتبها، هاتي نشوف ايش كاتب أخينا فيها. بيقول صاحب الفاكس، اشتريت أرض في أبحر الجنوبية عند دوار الجمل مساحتها (450م) فقط وشارعها عادي لا تجاري ولا غيرو ، يعني الحمد لله (الحد على القد) المهم تم استخراج تصريح بناء لسور وخزان وبيارة أكرمكم الله من بلدية أبحر الفرعية بعد ما اتأكدوا من الصك الأصل وهويتي بالإضافة إلى الكروكي التنظيمي، المهم بعد فترة سنتين ربي أكرمني بقرشين وحبيت أبني فيلا عشان أفرح أمي وأبويا وزوجتي وأولادي ونفتك من الإيجار اللي بهدلني وبهدل أغلب الغلابا اللي زيي واسأل الله انه يكرمهم زي ما أكرمني وافتكيت من الإيجار بس أهم شي انهم ما يوقعوا في المصيبة اللي أعاني منها من كم سنة. المهم حطيت دم قلبي وكل ما أملك وبديت ابني الفيلا دورين وملحق بعد ما أخدت التصريح الرسمي للبناء من مبنى الأمانة الكبير وبدأت البناء وخلصت وسكنت أنا وأسرتي وسويت حفلة كبيرة وعزمت أهلي وأصحابي ولعبنا المزمار لأني أنا وأهلي فرحانين بالسكن الجديد، (لكن وآآآآآه من لكن) لكن بعد سنتين من السكن خللي بالك سنتين جات المصيبة الكبيرة اللي ما كانت لا على البال ولا على الخاطر سلمني حارس الفيلا اللي شغال عندي ظرف وفتحت الظرف وأشوف المضمون اللي زلزل كياني قضية مرفوعة ضدي ومضمونها اني بنيت فيلتي على أرض ورثة المهم بعد روحة وجية ولفلفة ما بين كتابة عدل والمحكمة والبلدية اتضح ياسيدي انه الخطأ من البلدية لأنها منحت الأرض مرتين مرة عام 1397هـ والمرة التانية عام 1407هـ وهدا الصك اللي عندي بعد ما انباعت الأرض خمسة مرات ووصلت عندي. الأسئلة يا سيدي فتحي اللي أبغى أدحدرها. كيف البلدية أعطتني تصريحين وكيف خلوني أبني وكيف القاضي وقف لي الصك الخاص بيا بالرغم اني مقدم على صندوق التنمية العقاري ورقمي قريب .. المهم القضية من عام 1431 هـ في المحكمة الشرعية وأنا شغال كعب داير ما بين المحكمة وكاتب العدل والأمانة، وإلى الان ما انتهت وكلو من تحت راس البلدية الموقرة اللى وزعت صكين على أرض وحدة .. انتهى فاكس أخينا.. هااااه يا أمانة جدة الين متى والناس بتشتكي من ازدواجية الصكوك وارحموا من في الأرض يرحمكم من في السماء .. وعيشوا كتيييييير تشوفوا كتيييييير.
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 127 مسافة ثم الرسالة