• قبل 30 سنة كان ابويا (بن علي الحلواني) الله يرحمه يرسلني أنا واخواني عشان نشتري البيض وكان في ديك الفترة الشركات قليلة والشركة اللي بتبيع الدجاج الحي والبيض كان مكانها في جدة في شارع الملك خالد قبل ما توصل للكوبري الشهير اللي له اسم كدا مو مزبوط وكنا نجي من بدري عشان نمسك سرا من كتر الزحام اللي كان موجود وعشان كمان لا يخلص علينا البيض لانه ياويلوا اللي يرجع للبيت من غير طبق بيض حيلاقي علقة محترمة تستناه من ابويا الله يرحمه، المهم بعد حاني وماني في الزحام نرجع للبيت وكل واحد مننا في يده طبق البيض وكان سعروا في داك الوقت في حدود 6 ريال أو 7ريال والله أعلم وآآآآآآآه يازمن كانت أيام حلوة .. لكن في الزمن دا اللي كترت فيه شركات إنتاج البيض والناس بتلاقي البيض في كل مكان وفي كل دكان وفي كل سوبر ماركت تجي تشوف سعر الطبق يوصل لـ 16 ريال ليه ما تعرف رغم انه الانتاج في السنة الوحدة يوصل لـ 950 مليون بيضة حسب كلام كتير من المختصين في الحكاية دي عشان كدا أبغاكم تحطوا عشرة خطوط على الرقم دا 950 مليون بيضة يالطيييف يعني بالبلدي كدا البيض الموجود اكتر بمية مرة من استهلاك الاوادم والمفروض طالما الحكاية كدا يكون سعر البيض أقل من كدا بكتير لكن الواحد ايش يقول هذا غير انه الطاسة ضايعة مابين وزارة التجارة وحماية المستهلك، وزارة التجارة بترمي على حماية المستهلك وحماية المستهلك بترمي على وزارة التجارة وانت يا مواطن تروح فطيس بين الاتنين، والمفروض يكون في رقابة شديدة وقوانين صارمة على كل تاجر أو موزع للبيض يتلاعب بسعر طبق البيض وما يتركوهم كدا على هواهم يبيعوا ويشتروا في عباد الله لانه هدا الكلام ما قلتوا انا، هدا الكلام بيقولوا كتير من دكاترة التسويق والاقتصاد اللي قالوا بعظمة لسانهم انه سعر طبق البيض في الوقت الحالي مبالغ فيه، يعني الحكاية فيها لغوصة في لغوصة ما يعلم بيها الا الله، عشان كدا بقول يا تجار البيض ويا موزعين البيض وارضوا بالقليل عشان ربنا يبارك لكم فيه.. وعيشوا كتييير تشوفوا كتيييير.
هرجة: ياناس ياهوه طبقوا نظام الجمعيات التعاونية وارحمونا.