• ايش هادي الاستمارة اللي في يدك ياسيدي؟ هادي ياستي استمارة التبرع بالأعضاء أبغى أعبيها وأرسلها للجمعية عشان بعد ما ربنا سبحانه وتعالى ياخد أمانته أتبرع بكل الأعضاء اللي تحتاجها الجمعية لانه هدا التبرع حيكون فيه خير وفيه أجر كبير من الله سبحانه وتعالى ويعتبر صدقة جارية للمتبرع وبعدين هدا الادمي اللي حيموت ايش حيستفيد لما ياخد معاه قلبه والا كليته والا كبدته والا قرنية عينه ما حيستفيد أي شي. وبدل ما ياكلها الدود أتبرع بها لواحد مريض له سنين طويلة بيعاني من مرض في قلبه أو تليف في كبدته أو عنده فشل كلوي أو عنده عمى في عيونه وعند ربنا سبحانه وتعالى الأجر ما يضيع، عشان كدا أتمنى من كل قارئ أو قارئة بيقرأ مقالي وتكون صحته عال العال انه يحرك سيارته ويروح على جمعية التبرع بالأعضاء ويعبي الاستمارة وما يبخل على نفسه ولا على أهل بيته ويتبرعوا ويكسبوا الأجر والمثوبة من الله سبحانه وتعالى وصدقوني بتبرعكم بأعضاءكم حتزرعوا الأمل في نفوس الالاف من المرضى اللي بيعانوا من مرضهم وتعبهم ومعاناتهم فياريت نسعدهم ونفرحهم بالتبرع ونكسب الأجر والمثوبة من رب العالمين.
• أنا ماني عارف ليش الحبايب اللي في شركة المياه الوطنية والحبايب اللي في التحلية يحبوا يبهدلوا الأوادم وينكدوا عليهم عيشتهم لما يقطعوا الموية عن الناس وعن بعض الأحياء من غير احم ولا دستور ويجوا في الأخير يسمعونا مبررات وتصريحات غريبة عجيبة وكل وحدة منهم تتهم التانية انها هية السبب في انقطاع الموية عن أهالي جدة ، والمصيبة الكبيرة مو هنا، المصيبة انهم ما يقدروا المشتركين ولا يحترموهم ولا يعبروهم لأنهم ساكتين وما بيبلغوا سكان هادي الأحياء انه الموية حتنقطع عنهم عشان ياخدوا احتياطاتهم ويدبروا حالهم بالجوالين والا حتى بالبراميل الصغيرة، لكن للأسف يتركوهم كدا حايسين ومحتارين وما يعرفوا كيف يتصرفوا في هادي المصيبة اللي جاتهم، والدليل على كلامي الزحام والغشنة اللي حصلت في أشياب الوايتات ، مناظر للأسف يندى لها الجبين وانتظار بالساعات عشان المواطن الغلبان يلاقي وايت موية لكن الحمد لله بفضل الله ثم بفضل توجيهات أمير منطقتنا خالد الفيصل انتهت المشكلة وعادت الحياة لسكان الأحياء ولخزانات وحنفيات البيوت بعد ما كانت ناشفة لها كم يوم . وأتمنى من كل قلبي انه دي الحكاية ما تتكرر مهما كانت المبررات والأعذار .. وعيشوا كتيييييير تشوفوا كتيييييير.


للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة