دحين من ساعة ما جيت من المركاز وانت زعلان ومتعكنن ممكن أعرف ليه ؟ والله يا أم فتو اللي شفتوا يخلي الواحد يتنرفز ويزعل ويجيه الضغط والسكر إلى هادي الدرجة أولادنا وبناتنا رخاص عند هادي الشركة اللي بتقدم الاكل المقرطس في المقاصف المدرسية ، دحين انت ايش قاعد تقول فهمني ؟ صلي على النبي ونا أفهمك .. اللهم صلي على محمد ، هيا اسمعي يا ستي ونا جالس بلعب كيرم مع الشباب،، شباب ياسيدي قول شيبان عشان أصدقك .. برضنا ما تبطلي من الدق في الكلام ،، وي وي بمزح ياسيدي ،، المهم تجي عيني على برنامج الثامنة اللي بيقدمه المشاكس داود الشريان وكانت الحلقة بتتكلم عن المقاصف المدرسية وبحكم انه في شركة وحيدة هيه اللي ماسكه مشروع التغذية وياريتها ما مسكت ده المشروع لانه اللي سمعناه من كلام في البرنامج واللي شفناه من صور يخلي الواحد يستفرغ فما بالك بأولادنا وبناتنا اللي جالسين كل يوم وهما بياكلوا من هدا الاكل المقرطس اللي ضرره أكتر من نفعوا زمان أيام دراستي الابتدائية والمتوسطة والثانوية كانت المقاصف بتقدم السندوتشات أشكال وأنواع اللي بالجبنة واللي بالبيض واللي بالتونة واللي يبغى يتفنجر يشتري سندوتش (حمص أو طعمية) وكانت صحتنا الحمد لله زي البمب وما كان عندنا عصيرات زي اللي موجودة دحين كان اللي موجود قواريـر مشروبات غازية عشان تزحلق اللقمة ... دحين في الوقت الحاضر تحزن على وضع المقاصف والمأكولات اللي بيقدموها للطلاب والطالبات وكله من تحت راس المتعهد اللي ما يهمه إلا قد إيش يلملم من الفلوووس ، للأسف مأكولات كلها مقرطسة ما لها لاطعم ولامعنى اللي يقولك كراسون جبنة وإلا زعتر وإلا لبنة وياريتها طازة بالعكس عجاين كلها مقرطسة وبايتة من أسابيع هدا غير اللي بينباع في المقاصف المدرسية من شكولاتات وشيبس وحلويات وعصاير مكرتنة مصبوغة بطعم البرتقال والتفاح وكلها مأكولات وعصاير (تسمن) لكن ما تغني من جوع مأكولات أي كلام وطلابنا وطالباتنا مغلوبين على أمرهم لازم يشتروا عشان يسكتووا جوعهـم لأنه المتعهد اللي ماسك هادي المقاصف زي ما قلنا ما يهمهم صحة أولادنا ولا بناتنا والله يرحم أيام زمان ومقاصف زمان .. أنا أتمنى من كل قلبي إنه الحبايب في وزارة التربية والتعليم يهتموا شوية بحكاية المقاصف المدرسية وتسوي اتفاقيات مع شركات غذائية لها خبرة طويلة في المجال ده عشان تقوم بتقديم وجبات الإفطار الصحية الغنية بالفيتامينات لأنها أحسن مليون مرة من المعجنات المقرطسة اللي مالها لا طعم ولا قيمة غذائية عشان نحافظ على صحة طلابنا وطالباتنا وتتفق كمان مع شركات العصايـر والحليب اللي منتجاتـها طازة وموجودة في كل سوبرماركت لأنها كمان أطعم وأفيد مليون مرة من العصايـر المكرتنة اللي كلها صبغات ومثبتات ومواد كيميائية وياريـت يكون كمان في بكتات من التمـور واللبن عشان تفيد طلابنا وطالباتنا في عافيتهـم وصحتهـم لأنه بيني وبينكم فقر الدم والسمنة زادت عند طلابنا وطالباتنا وكله من تحت راس هادي المأكولات المقرطسة والمسرطنة .. وعيشوا كتييييير تشوفوا كتيييير.