على فين كده ياسيدي مشمم مبخر رايح فين؟ رايح ياستي أسلم على مدير الجوازات وبالمرة أتكلم معاه في كم شغلة تهمهم وتهم المراجعين كمان.. طيب أفطر قبل لا تنزل.. اعطيني بس كوب الحليب مع حبتين شابورة كفاية.. حاضر ياسيدي دقيقة بس وهادي كوباية الحليب وهادي الشابورة.. يللا في أمان الله ولا تنسي تسوي المعدوس على الغدا البرد هلكنا.. ووصلنا مكتب مدير الجوازات.. يا مدير الجوازات الله يعطيك الصحة والعافية مشروع أبشر اللي اعتمدتوه عشان يرتاح المراجع اللي يجي للجوازات مشروع حلو وعال العال بس زي ما بيقولوا الزين ما يكمل، يعني ياريت لما المراجع والا المعقب يجدد إقامة عامل عن طريق برنامج أبشر ياريت يكون تسليم الإقامات في مكاتب تفتحوها في المولات يعني مو شرط إنه الكفيل أو المعقب يضرب مشوار حق 10 كيلو أو 20 كيلو عشان يوصل للمبنى ده اللي في الكندرة أو في المبنى اللي في الرحاب لأنه زي منتو عارفين ياكتر الوافدين اللي في البلد وعشان تخف الزحمة والغشنة من المبنى الرئيسي لازم تفتحوا مكاتب كتييرة في المولات المنتشرة في مدينة جدة من شمالها وجنوبها وشرقها وغربها ويكون عند ضباط هادي المكاتب صلاحيات مدروسة بعناية عشان يقدروا يخدموا كل المراجعين من كفلاء أو معقبين واللي بيقوموا بمراجعة هادي المكاتب الموجودة في المولات وياريت تقدم هادي المكاتب كل الخدمات اللي يحتاجها المراجع من استلام الإقامات المجددة أو نقل المعلومات أو تعديل صلاحية الجواز لأنه في بعض الحبايب اللي في مكاتب الجوازات سواء في الكندرة أو في الرحاب بيسوو أبو عرام للمراجع يعني مثلا المراجع يكون عنده شغله زي نقل المعلومات ويكون ماسك سرا ساعتين زمان ولما يوصل للموظف يقولوا راجع مكتبنا اللي في الرحاب يا ابن الحلال يهديك يرضيك ضارب مشوار 10 كيلو ومتسمر ليا ساعتين في الصالة وتجي تقولي راجع مكتبنا اللي في الرحاب عشان كده أنا عندي سؤال حدحدروا عليك: شبكة الكمبيوتر اللي في الجوازات مو مربوطة مع بعضها ؟ ليش تغلبني وتغلب غيري وتخليه يضرب مشوار تاني ويمسك سرا تاني والخدمة ممكن تقدمها للمراجع في أقل من دقيقة وبضغطة زر وهدا الكلام بينطبق كمان على اللي يبغى يراجع مكتب جوازات الرحاب في حكاية تسليم الإقامات الجديدة يعني المراجع بيروح لمكتب الرحاب عشان يستلم الإقامات الجديدة والحبايب اللي في الرحاب يدفووه روح استلمها من مبنى الجوازات اللي في الكندرة طب ليه يا حبايب تدفوه على الكندرة طالما المكاتب مربوطة بشبكة وحدة لجل كده بقول لحبيبنا مدير الجوازات عشان يكون مشروع أبشر بحق وحقيق لازم أسهل على المراجعين الكتيير من مشاكلهم ويقدروا يستلموا إقاماتهم عن طريق البريد أو من أي مكتب سواء اللي في الرحاب أو من أي مكتب من المكاتب الموجودة في المولات، وياريت كمان تكون كل الخدمات اللي يحتاجها المراجع متوفرة في كل مكاتب المولات عشان تخف الزحمة والغشنة اللي بنشوفها في الجوازات اللي في مبنى الكندرة وتفتكوا كمان من أسطوانة امسكوا سرا.. وأخيرا اسمحلي أقولك.. الله يعينكم ويساعدكم ويعطيكم الصحة والعافية على كل الجهود اللي بتقوموا فيها أنت وكل الكوادر الموجودة في الجوازات وعيشوا كتيييييير تشوفوا كتيييييير..