قصيدة ألقيت البارحة في افتتاح مهرجان الجنادرية.

وقفنا والبحور لها مفاتيح ولها شطين
جواهرها يحاصرها الزبد والموج واهواله
سرينا والمراكب مبحرة واهل السفن سارين
وفنار العز لا نوّر نصيناه وعنينا له
سلام الله على نور الفجر ساس الفخر والدين
وطنا اللي غرسنا ارواحنا في صحصح رماله
رسمنا له على سطح الثريا نخلة وسيفين
شعارٍ ثبّته عزم الموحد وانثنينا له
دحم كتف الجدي يوم المداحم واعتلى به لين
رسى بالعدل وطيور السعد تفخر بمنزاله
عزيزٍ عز دينه واعتنز واهل الجهل غاوين
حكم بالمصحف الطاهر ونور الشمس يزهى له
لفى كن السحابة مهرة بيضا ورد الدين
عسف غر السحاب ولاح برقه واسبل خياله
على قب الرمك غار وكتب بالسيف ابوحدين
حروف النصر والتاريخ يفخر به وبامثاله
سرى صقر الجزيرة واعتزى في مقدم الستين
تحزم بالظفر والحر ضلع طويق مدهاله
بطولات وملاحم ما يشوهها غراب البين
وهو صوته نعيق وعن بلدنا تقصر حباله
وطنا لا يهمك يا وطنا زمرة الباغين
ليا هب الهوى وجنوبهم للريح مياله
نعرف الدس والمدسوس لو يلعب على الحبلين
يعريه الضحى والشمس دايم تفضح اقواله
وحنا في مدارات الوفا نبقى سعوديين
على وضح النقا ما نختلف لو كبرت القاله
اهل نخوه واهل فزعه وفي وقت اللقا صلفين
واهل روسٍ تدونها العزاوي مع هل الطاله
نشوش ليا زهمنا في الشدايد خادم البيتين
عسى الله ينصره ويعز دار المجد بظلاله
وريث السرج وخيار الاشده في العسر واللين
وعود الزان والشلفا وتاج العز ورجاله
ليا شفنا الوفا فوق الثرى يمشي على رجلين
عرفنا وجهه الطلق السموح وميلة عقاله
ابو متعب ولا غيره تعب وابكى بيوت الطين
ومن زود الوفا يتعب ويبقى الشعب في باله
نحبه مثل حبه للوضوح ونصرة المسكين
ونفخر به مثلما تفتخر به سطوة افعاله
ليا قلنا الكرم حطوا على اسمه بالذهب قوسين
وقولوا كف ابو متعب سماه وعمه وخاله
ركن نجد وذرى العارض وسلمى واليمين يمين
عطاه الله من حكمة معزّي واطيب خصاله
رسى بسياسته والشعب من زود الولا راسين
سديد ونظرته تجعل سديد الراي يلجا له
خليج العرب يا كثر الجدل والشك والتخمين
تهب الريح وامواج البحر تصفق على جاله
وابو متعب من الطنخه نهار الكايدات يبين
شبك كفه بكفه والخليج يعانق آماله
هلا بالاتحاد ووحدة الصف القوي واهلين
جسد واحد وحنّا له خلايا والنصر فاله
وهو دونه مثل صوت العزاوي في بدر وحنين
يوقف والجبال الشم عن يمناه وشماله
قيادات الخليج ليا كلح وجه الزمان الشين
هقاويهم تنوش البرق والنوماس ترقى له
ليا نادى مناديهم وقفنا مثل سور الصين
وحنّا للحمل لا مال فوق المتن حنّا له
خليجيين فينا المجد له راس وجسد وايدين
من الجهرا ليا ساحل صلاله ترسي جباله
رفعنا اسم الخليج وخلدوه اجدودنا الوافين
قبل بترولنا يرفع رصيده ويتهيا له
ولا هم الخليج اليعربي لو كثروا الواشين
يا عساس الدروب الليل عسعس والنجم داله
ينز من الشهامه في جباه اهل الوفا عرقين
ولكن الزمان اللي نعرفه غير احواله
عجوز الفتنه الشمطا تخطى والعرب دارين
وتنسج من ظلام الليل ثوب وتفهق هلاله
تشب النار ما بين الطوايف مثل ابو وجهين
وركب الظلم تبرا له وصوت الحق تغتاله
رمت عقد الذهب بين القرايب واغمزت بالعين
ولا شبوا الحرايب تلبسه وتروح مختاله
عرب ونقول حنا اهل الفصاحه ترثة الغازين
ولا نكتب لها جمله تعيد المجد لابطاله
ينادينا النخيل اللي انحنى في ضفة النهرين
خذت تمره وشامت عن جريده ودمرت حاله
ورزت في بلاد العُرب بيرق وغرست سكين
وفاض النهر بالدم الحمر والناس رحّاله
على وين الرحيل وعزة الفيحا تنادي وين
ولا نسمع سوى الظالم يردد صوت مواله
وموعدنا نهارٍ فيه نذكر معركة حطين
ليا غارت سرايا الموت رجليه وخيّاله
يموت الحاكم الجاير وشعبه لا رحل راضين
وتاج العز يبقى والجبان يطيح تمثاله
عبس وجه الخريف ولا عبسنا والعرب صفين
وروس الذل طاحت والسعودي يشرب دلاله
رياح الشرق ما تشقر عصانا لو تهب سنين
ولا نسمع تخاريف اصفر العرقوب واشكاله
عوايدنا يابو متعب نرد الصاع بالصاعين
ولا ناديت لبينا وبرّكنا لك جماله
على يمناك زيزوم السرايا اللي كما الشاهين
عقيد الجيش لا ثار الفشق يوفي بمكياله
تفرّس بالسياسه قبل يبلغ سنه العشرين
عضيدك محزمك سلمان يسلم راسه وحاله
ووقفات الجسارة والسعد لو نجمع الثنتين
قرنها راس مقرن في الوديعه واحتمينا له
يهد الصقر من فوق المجره والجبال تلين
ولا شح الزمن لالا حشا ما شحت جزاله
عليكم ياهل العوجا سلام معرب الجدين
مشاعر شاعرٍ يفخر بذكر العود وعياله

عبدالله عبيان اليامي