أيوه ياسيدي ما قلتلي كم باقيلك على التقاعد؟ لا حول ولا قوة الا بالله دحين انتي لكي كم يوم وانتي بتسأليني السؤال ده وانا بقولك لسه بدري الا تفضحينا عند الحبايب حقون التقاعد «وجعلنا من بين ايديهم سدا ومن خلفهم سدا فأغشيناهم فهم لا يبصرون» وبعدين انتي مستعجله على تقاعدي ليه اذا ونحنا على رأس العمل والراتب بالكتيير يكفينا ايجار بيت ومصاريف تبغيني اخد تقاعد عشان يروح نص الراتب خلينا كده مستورين ونسأل الله انه عيونهم ما تجي لا عليا ولا على غيري من الغلابا قال تقاعد قال، اجلس اكرف 40 سنه وفي الاخير يعطوك الفتات، من يوم ما اشتغلنا ونحنا لسه وراور وحلوين اعمارنا 23 سنه وهما كل شهر بيستقطعوا مننا 5% وبعدين زودوها 7.5% اليين وصلت 9% وبياخدوا من جهة عملنا كمان 9% ولمده 30 سنه سواء مصلحة معاشات التقاعد او التأمينات الاجتماعية يعني ال 18% حقي وحق غيري بيستثمروها يعني مليارات الريالات جالسه تلف وتدور في صناديق الاستثمار ونحنا الغلابا كل اللي بنلاقيه منهم الراتب الشهري وياريته الراتب الكامل اللي كنت بتستلمه وانت على راس العمل عشان كده انا عندي كم سؤال ابغى اسدحوا على مصلحة معاشات التقاعد والتأمينات الاجتماعية وابغى الاجابة منهم فين ارباحنا من هادي المليارات اللي بيستثمروها وبعدين ليش بعد ما ياخدوا التقاعد بتقصقصوا من الراتب مو هدا الراتب حقهم وحق اسرهم ؟وليش تقصقصوا من راتبه بعد وفاته مو هدا حق من حقوقه؟ وليش تحرموا اهل بيته انهم يستفيدوا من حصة راتبه بعد وفاته؟ وليش بعد البنت ما تتزوج او الولد بعد ما يتوظف تستقطعوا رواتبهم ليش ما تحولوا حصتهم للأم او للاخت عشان يستفيدوا من راتب زوجها او اخوها مو ده راتبه وحق من حقوقه يا مصلحة معاشات التقاعد ويا التأمينات الاجتماعية خلو بالكم من المتقاعدين اللي خدموا البلد بعرقهم ودمهم ولحمهم اعطوهم حقهم ولا تبخسوهم في حقوقهم والحمدلله بلدنا فيها بركه وفيها خير بس انتوا صفوا النية والخير والبركه حتعم كل متقاعد في بلدنا الحبيبة يا مصلحة معاشات التقاعد ويا التامينات الاجتماعية خلو بالكم من المتقاعدين وارفعوا رواتبهم قد ما تقدروا لانه الحياة صارت صعبة كل شي ارتفعت قيمته الا قيمة هدا المتقاعد الغلبان وياريت كمان تحاولوا تعطوهم بطاقات علاج مجانية في المستشفيات وتتفقوا مع شركات الطيران انها تعطيهم تذاكر سفر مخفضه وياريت كمان تبنوا في كل حي نادي مصغر يمارسوا فيه رياضاتهم او انهم يتونسوا فيه وتحاولوا كمان قد ما تقدروا انكم تبنوا ابراج سكنية في كل مدينة لانه في اكتر من 50 % من المتقاعدين ما عندهم سكن على الاقل تردوا لهم القليل من الجميل من تعبهم وكدهم وخدمتهم لبلدهم.. وارحموا من في الارض يرحمكم من في السماء.. عيشوا كتيييير تشوفوا كتييييير.