صباح الورد والفل والياسمين يا حبايب وكل عام وانتو بصحه وسلامه وأسأل الله سبحانه وتعالى انه يتقبل من الحجاج حجهم ويرجعوا لبلدانهم سالمين غانمين وبحج مبرور وسعي مشكور ودحين خلونا ندخل في هرجتنا للجمعه دي. دحين انت ما تعرف تقعد جبتلي الصداع من كتر اللف والدوران من الغرفة للصالة ومن الصالة للغرفة زي (فرقنا) بياع القماش. ضرسي يا ام فتو ضرسي احس عيوني حتنخلع من مكانها من كتر الالم ... لا المويه والملح نفعوا... ولا الخل كمان حتى البنادول ما منه فايده.. تستاهل اللي يجيك وبعدين انا عارفه انه ضرسك ده ما يهيج عليك الا في السنه مرتين في عيد رمضان من كتر ما تقرمط في الحلاوه البلدي واللبنيه والهريسه والدنجوه وبيض الكوكو وطبطاب الجنه وفي عيد الحج من كتر ما تاكل في اللحم شغال مافي الا هرش في اللحمه والكبده والفشه والقلوب وما تسمع الا طقطقة عظام الدبيحه .... الله اكبرعليكي ياشيخه بدل ماتشوفيلي حل في المصيبه اللي انا فيها جالسه تُنقي و ترغي وتتريقي ... حاضر ياسيدي اروح اجبلك حبتين بنادول وان شاء الله يخف الالم ... مافي فايده قربعت كم حبه ومافي منه رجا الالم كل مالو يزيد ... طيب قوم ياسيدي نروح مركز الاسنان اللي جنب البيت... طيب البسي عبايتك والحقيني على السياره آآآآآه ياضرسي... وصلنا المركز وقلت للسستر ابغى اخلع ضرسي ... ردت بلغه مكسره 200 ريال ادفع .... وول وول 200 ريال قيمة الكشف على كده خلع الضرس بكم ؟ وقلت في نفسي يعني بنات البلد ما يعرفوا لشغلة الاستقبال دي يللا سلمولي على السعوده المهم دخلت للدكتور وجلست على كرسي الكشف وقعد يقلب في فمي يمين وشمال فوق وتحت وانا اضحك واقوله هااااه بشر يا دكتور (ثني والا جدع) فطس الدكتور من الضحك وقال هوه الضرس فين ؟ في الجنب اليمين يا دكتور رد عليا وقال هدا الضرس مره ملتهب وما يحتاج خلع دحين اول شي حعطيك مضاد حيوي عشان يخف الالم وبعد كده نخلعو ونسحبلك العصب حقو كمان عشان ترتاح منه بالمره ... طيب يا دكتور هوه سحب العصب بكم ؟ العصب الواحد بـ 500 ريال وانت يبغالك 3 جلسات وفي كل جلسه نسحب عصب يعني حتصير الحسبه كلها 1500 ريال بس ... وول وول 1500 ريال ليه هوه انا حسحب شاصيه وقبل ما اخرج من غرفة الدكتور قالتلي ام فتو اسأل الدكتور بكم تقويم الاسنان سمعها الدكتور وقال بعيون قويه بس 6000 ريال وممكن نخليها لكم على اقساط ..... طالعت في ام فتو وقلتلها ولا يهمك باقي على نهاية السنه الهجرية كم يوم وانا اجبلك كرتون تقاويم من اللي يحبها قلبك وخرجت من غرفة الدكتور وقلت في نفسي هوه نحنا ناقصين اقساط حياتنا كلها اقساط في اقساط المهم رجعنا البيت بعد ما اشتريت المضاد الحيوي اللي قال عليه الدكتور وشربت منه وعينك ما تشوف الا النور كل شويه وانا داخل الحمام (الله يكرمكم) صار الالم فوقاني تحتاني وانا على حالتي دي جات عيني على ام فتو واشوف الحرمه فاطسه من الضحك وعيونها دمعت وقالتلي هوه انت ضرسك يوجعك والا بطنك ... اقولك سيبيكي من الضحك وهاتيلي كم حبه قرنفل بلا مركز اسنان بلا بطيخ.
وعيشوا كتيير تشوفوا كتييير.