حكاية السحر اللي بنسمع ونقرأ عنها الايام دي واللي بتخص حبايبنا في نادي النصر واللي بتقول ان النادي مسحور وعشان كده بعيد عن البطولات من سنوات طويلة حكاية ما لها طعم ولا مازية على قول المرحوم (ابو عنتر) واتمنى من كل محبي نادي النصر انهم يطنشو ولا يصدقو هادي الخزعبلات والنصر ان شاء الله كبير برجاله وادارته ولاعبيه الجدد مو اللاعيبه اللي بيمثلوه في دوري زين هادي الايام وان شاء الله البطولات حتجي بإذن الله بس يبغالها شوية تضحيات ويبغالها شوية تفكير يعني بالبلدي كده ابغى او شوش حبيبنا الامير فيصل بن تركي واقوله السنة دي اعتبرها (عوافي) من البطولات لكن السنة الجية يبغالها تنظيم وترتييب ويبغالك لعييبه فنانين يعرفوا يلعبوا كوره صح ويبغالك لعييبه اجانب مميزين ويبغالك مستشارين ولعيبة من الجيل القديم زي الجوهرة ماجد عبدالله والموسيقار فهد الهريفي وشبح الملز يوسف خميس وهما اللي حيعرفوا الخلل فين عشان ما يبدأ الدوري الا والفريق جاهز في كل المراكز اما اللاعيبه اللي موجودين في الفريق في الوقت الحاضر فعمرهم الافتراضي انتهى وما حيقدموا للفريق اكتر من اللي قدموه في السنوات اللي فاتت لانه مستواهم الفني بصراحة أي كلام عشان كده يا ريت نعطيهم سكه من غير رجعه وبحول الله يرجع النصر زي ما كان ايام الرمز رحمة الله عليه الامير عبدالرحمن بن سعود وحترجع البطولات والانتصارات ترفرف في كل أرجاء النادي العالمي.
* يعجبني ابراهيم هزازي في حماسه ولعبو وهو لاعب مميز بس لو يبعد عن العنتره والعنطزه ويمسك اعصابه في الملعب وخارج الملعب صدقوني حيكون ظهير أيمن مميز في لعبه واخلاقه بس الله يهديه خبصها في الاخير كنت اتمنى انه يكون رزين في كلامه وتصريحاته بعد مباراة الديربي بدل ما يسوي فيها ابو عرام ويقول (رديت على كل المشككين) يا ابراهيم الله يخليك لسه لحم اكتافك من حبايبك الاهلاوية. * أتمنى من لجنة المسابقات الرياضية انها تنصف وتختار تيسير الجاسم وتعطيه جائزة المركز الاول على المستويات الجميلة والرائعة اللي بيقدمها سواء في مباريات الدوري او مباريات البطولة وصدقوني يا حبايب تيسير الجاسم يستاهل والا انتو ايش رأيكم؟
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زيــن تبــدأ بالرمز 150 مسـافة ثم الرسـالة
abofatoo@hotmail.com
* يعجبني ابراهيم هزازي في حماسه ولعبو وهو لاعب مميز بس لو يبعد عن العنتره والعنطزه ويمسك اعصابه في الملعب وخارج الملعب صدقوني حيكون ظهير أيمن مميز في لعبه واخلاقه بس الله يهديه خبصها في الاخير كنت اتمنى انه يكون رزين في كلامه وتصريحاته بعد مباراة الديربي بدل ما يسوي فيها ابو عرام ويقول (رديت على كل المشككين) يا ابراهيم الله يخليك لسه لحم اكتافك من حبايبك الاهلاوية. * أتمنى من لجنة المسابقات الرياضية انها تنصف وتختار تيسير الجاسم وتعطيه جائزة المركز الاول على المستويات الجميلة والرائعة اللي بيقدمها سواء في مباريات الدوري او مباريات البطولة وصدقوني يا حبايب تيسير الجاسم يستاهل والا انتو ايش رأيكم؟
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زيــن تبــدأ بالرمز 150 مسـافة ثم الرسـالة
abofatoo@hotmail.com