عجيب يا وزارة العمـل

من ساعة ما جيت من الجريدة وانت زعلان ومتعكنن، ايش في ياسيدي فهمني؟ آآآه بس شي يجيب الهم والغم ووجع القلب، طول السنة تقرأ وتسمع منهم الاستراتيجيات والدراسات والاجتماعات والتصريحات وفي الأخير يطلع كل الكلام اللي قرروه وصرحوا بيه في الجرايد فشنك في فشنك.. انت ايش قاعد تقول ياسيدي أنا مو فاهمة شي ؟، أول شي هاتي طبق الكنافة وانا أفهمك الهرجة من طقطق لسلام عليكم، وجابت الحرمة طبق الكنافة وجلست أنقنق فيها هيا اسمعي ايش رايح أقول، كل يوم ياستي ووزارة العمل تطلع بعجايب وغرايب ولا عجايب الدنيا السبعة يعني في يوم الجمعة بتاريخ 28/1/1433هـ كان في تصريح طويل عريض من وزارة العمل بيقول بالفم المليان (حد أدنى لرواتب القطاع الخاص بـ 3000 ريال).. ولمن الغلابى اللي شغالين في الشركات الخاصة بمهن مختلفة أو بمهنة حارس أمن أو سواق ورواتبهم ما تزيد على 2800 عرفوا وسمعوا عن هدا التصريح فرحوا وطاروا من الفرح وقالوا في جوة نفوسهم الحمد لله هانت وأتيسرت وبدأوا يرتبوا حياتهم على الـ3000 ريال اللي حتجي لكن للأسف قبل أسبوع تقريبا وبالتحديد في يوم السبت 2/9/1433هـ جاهم تصريح من وزارة العمل دمرهم وعكنن حياتهم.. ايش بيقول هدا التصريح ياسيدي ؟، بيقول ياستي وخلينا نحط تصريحهم بين قوسين عشان نِزبرقوا ونِرستكوا ونِأنتكوا «الحد الأدنى للأجور لا ينطبق على العاملين بالقطاع الخاص» يعني ايش ياسيدي ؟، يعني ما ياخد الـ 3000 ريال إلا اللي يشتغل في الحكومة أما الغلابى اللي في القطاع الخاص مالهم قيمة عند وزارة العمل يعني بالبلدي كدا لا تحلموا بالـ 3000 ريال.. وي وي ياسيدي اشبها وزارة العمل رجعت في كلامها؟، ما هي أول مرة ياستي، هادي وزارة العمل وهادي عاداتها يطلعولك بتصريح ناري وفي الأخير كلوو حبر على ورق وزي منتي عارفة الكلام ما عليه جمرك ودايما خيرنا لغيرنا، والمصيبة الكبيرة انها تاركة الحبايب أصحاب الكرفتات يسرحوا ويمرحوا في القطاع الخاص وبيحولوا المليارات لبلدانهم وجات على أولاد البلد ووقفت شوكة في حلوقهم لكن الواحد ايش يقول في هدا الشهر الفضيل إلا حسبي الله ونعم الوكيل.. وإني امرؤ صائم.. وعيشوا كتيييير تشوفوا كتيييير.

abofatoo@hotmail.com


للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة