حج يا حاج

ماشاء الله تبارك الله على فين كدا يبو فتو شايل عفشك ورايح على فين شكلك حتحج زينا هادي السنة... لا خلاص يا عم معتوق أنا الحمد لله حجيت أيام اللواري وأيام القلوب الطيبة لما كنا نشيل خيمتنا وعفشنا ونخيم في أي مكان يعجبنا مو زي حج الأيام دي اللي صار يقصم الظهر من كتر رسومه الغالية وانت الله يعينك تحج وترجع بالسلامه ولا تنسانا من الدعاء في عرفات.. بس ما قلت لي عسى رسوم الحملة اللي رايح معاها للحج مو غالية .. خليها على ربك أصحاب الحملات هادول يسلخوا من غير قبلة؟، ليه قد إيه دفعت عسى مو كتييير؟، زي منت عارف أنا رايح الحج أنا والحرمة وواحد من الأولاد دفعت بس 24 ألف ريال يعني على الراس الواحد بس 8 آلاف ريال وفي منطقة (هـ) يعني خارج حدود منى.. وول وول ليه كدا؟، هدا أرخص شي يبو فتو.. ياسيدي لا تزعل نفسك أكيد حيعتمروا بدالكم وحيطوفوا بدالكم ويرموا الجمرات بدالكم وأكيد كمان قيمة الدبيحة محسوبة مع الرسوم.. جالس تتريق حضرتك.. بمزح معاك ياراجل والله شي يزعل يعني اللي يفكر انه يحج يبغالوو يقسط سيارة ويبيعها عشان يقدر يحج.. بعدين يبو فتو روح شوف واسمع عن الأسعار اللي تبكي وتشيب راسك، رسوم حج توصل لـ 100 ألف ريال للراس الواحد.. ياحبيب قلبي هادول الناس اللي بيدفعوا هادي المبالغ ما تفرق معاهم الـ 100 ألف كأنها 1000 ريال عندهم لانه ياعم معتوق هدا الحاج المترف اللي دافع المبلغ اللي قلت عليه يبغى يسكن في فندق 7 نجوم ويبغى مخيم فخم وتكييف مركزي وبوفيه مفتوح فيه كل أنواع الأكل والشرب ولازم يكون في المخيم كل الخدمات من اتصالات ونت وفاكس عشان يبغى يتابع تجارته وأعماله ويبغى سيارات آخر موديل توديه وتجيبه، يعني أستغفر الله العظيم جي بس للسياحة مو للعبادة.. نسأل الله السلامة..
ياناس ياهوه عمروو الحج ما كان كدا، الحج عبادة ودعاء وتذلل وتقرب لله عز وجل في أيام معدودات لكن ايش تقول إلا الله يهدي ما خلق وعيشوا كتيييييير تشوفوا كتيييييير.
وأشوفكم بعد الإجازة وكل عام وانتو بخير وصحة وسلامة.

للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز ؟؟؟ مسافة ثم الرسالة