بنتي يافتو ما تلاحظي أبوكي من ساعة ما جاء من بره بس جالس يرفس إذا أتكلم رفس وإذا جلس رفس حتى وهوه يتفرج الكورة يرفس ؟ شكلوا كدا يا أمي بيتخيل نفسه انه بيلعب معاهم .. يلعب معاهم ايه انتي التانية أقول لك أبوكي مو طبيعي اليوم جالس يرفس من أول ما دخل البيت صدقيني يابنتي الحكاية فيها إن، روحي انتي كملي مذاكرتك وانا حشوف ايش الحكاية معاه .. ياسيدي كيف حالك ؟ الحمد لله تمام وعال العال وبرفس كمان .. طب ياسيدي ايش حكاية الترفيس اللي جاتك كدا فجأة ؟ والله يا ستي شكلوا كدا عظام رجولي مفككة ويبغالها المزيتة حق المكاين عشان نبطل من حالة الترفيس دي وزي منتي عارفة كبرت في السن وصرنا ما نمشي إلا بالعكاز .. المهم ونا جالسة جنب سيدي وتجي عيني على الجريدة وأشوف فيها خبر خلاني أمووت من الكركرة والضحك هيا اقروا معايا ايش بيقول الخبر ( أرجل حمار مقطوعة في بلجرشي تثير قلق الأهالي) ، ايش في يا حرمة بتضحكي ليه ؟ ، مافي شي ياسيدي بس أبغاك تقرأ الخبر دا وتقول لي ايش رأيك، وما خلص سيدي من قراية الخبر إلا فرصع عيونه ورفسوا زاد، يالطيف ألطف لا يكون اللحم اللي اكلتوا في المطعم لحم حمار استر ياستار حتى الحمار اللي حرمه الله علينا حللوه وطبخوه لنا أصحاب المطاعم ونحنا ياغافل لك الله ، من جد بعض المطاعم ذمتها واسعة وما تفرق معاهم حمار حمار وكله في الأخير لحم لانه بعض المطاعم ماتفرق معاهم جاها اللحم في أكياس مربطة وهات يا طبيخ مندي ومظبي واللي يحبه قلبكم .. لكن الحق مو عليهم الحق على حماية المستهلك اللي نايمة في العسل تاركة بعض المطاعم الشعبية المنتشرة في البلد تسرح وتمرح زي ما تبغى لا رقابة ولا يحزنون، هدا غير أسواق اللحوم اللي الرقابة فيها معدومة والله عالم ايش من لحوم جالسين يبيعوها على خلق الله . عشان كدا بقول يا حماية المستهلك ويامراقبي الأسواق قوموا من مكاتبكم واتلحلحوا وشوفوا أسواق اللحوم والمطاعم لا يكون الحبايب جالسين يبيعوا حمار حري والا حمار سواكني على خلق الله ونحنا يا غافل لك الله .. وعيشوا كتيييييير تشوفوا كتيييييير.
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة
abofatoo@hotmail.com
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة
abofatoo@hotmail.com