ايش دا الزعيق والصراخ اللي في درج العمارة ياحرمة ؟ هادول ياسيدي أولاد وبنات الجيران من يوم ما طلعت نتايجهم ونجحوا وهما مسويين حراج في العمارة .. لا يكون هادول من جماعه 1,1,1,1 واتقنت ؟ ايوه ياسيدي زي ما قلت كلهم من دول الجماعة في ورقة النجاح 1,1,1,1 وفي العقل صفر,صفر,صفر,صفر لا يعرفوا يقروا ولا يعرفوا يكتبوا وكله من تحت راس هادي المناهج الجديدة ومن تحت راس هدا اللي اسمه التقويم المستمر اللي حيطلع جيل الله العالم كيف حيكون حالوو .. الله يكون في عونهم وعون أهاليهم اللي حيتعبوا معاهم لانه التقويم المستمر دا يبغالوا متابعة مستمرة مابين المدرسة والبيت وسيبينا من السيرة دي واعطيني الجرايد حق الاسبوع اللي فات خليني أشوف ايش فيها .. وجات الجرايد وجلست أقلب فيها وجات عيني على خبر مكتوب بالخط العريض بيقول (بحيرة مسك جديدة في الخمرة تقتحم المباني وتزكم الأنوف وبيقول كمان أستيقظ أهالي الخمرة ذات صباح واكتشفوا أن مخطط المنح جنوبي جدة الحديثة يعوم على بحيرة متدفقة مجهولة المنبع، ولم يتوقف الأمر عند هذا الحد فحسب بل إن المياه تبدو مثل نهر جارف يتهدد المساكن والممتلكات وتعج بالبعوض والأسماك الصغيرة والطيور النافقة.).. قلت بيني وبين نفسي ياعيني وياسلام سلم نحنا ما صدقنا نخلص من بحيرة المسك اللي في الشمال تقوم تطلع لنا وحدة جديدة في الجنوب وربنا يستر لا تطلعنا كمان بعد فترة بحيرة في الشرق وبحيرة في الغرب عشان تكمل الناقص ونكون محاصرين من الجهات الاربع.. مساكين أصحاب المنح في مخطط الخمرة مالحقوا يفرحوا بالاراضي اللي جاتهم إلا وتطلع لهم مصيبة أكبر ماكانت لا على البال ولا على الخاطر والمصيبة انه جريان هادي الموية واللي هيه عبارة عن نهر جاري من مخلفات الصرف الصحي جية من مكة المكرمة وعدت بحرة ووصلت لابو جعالة ومن أبو جعالة وصلت لمخطط ابن جلوي ومخطط ابن لادن وصارت دحين بتهدد حياة السكان اللي انبح صوتهم وهما بيطالبوا المسؤولين في مصلحة البيئة والمجلس البلدي والأمانة انهم يشوفوا حل للمصيبة دي واللي ما يجي من وراها إلا انتشار الأمراض والأوبئة عشان كدا بقول يا حبايبنا يللي في مصلحة البيئة والمجلس البلدي والأمانة ألحقوا سكان مخطط الخمرة لا يروحوا فطيس بسبب الأمراض اللي حتجيهم من تحت راس هادي البحيرة والحقوا مساكنهم اللي حتنهار عليهم بسبب جريان هدا النهرالمعفن عليهم .. وعيشوا كتيييييير تشوفوا كتيييييير.
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة
abofatoo@hotmail.com
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة
abofatoo@hotmail.com