ايشبك ياسيدي جي من برا كدا عرقان ؟ عشان ياستي كنت في التشليح والجو برا حار ورطوبة وجات السيارة كمان كملت الناقص مافيها مكيف ؟ وليه مافيها مكيف ياسيدي ؟ عشان ياستي مصارين الكمبروسر انحرقت ويبغالها تغيير عشان كدا رحت للتشليح اشوف كمبروسر مستعمل ونركبوا في السيارة .. طب ياسيدي ليش كل دي الهجولة كنت رحت عند اصحاب قطع الغيار الاصلية واشتريت واحد جديد بدل دا المستعمل اللي الله العالم كيف حتكون حالتوو.. رحت ياستي زي ما قلتي عند اصحاب قطع الغيار الاصلية عشان اشتري واحد جديد واول ما دخلت المحل سألت البياع بكم الكمبروسر ؟ رد عليا بلهجة عربية مكسرة.. استمارة جيب.. واعطيتوا الاستمارة وجلس يطقطق على الجهاز اللي قدامه واتنحنح وقال.. هازا في 2850 ومسك الاله الحاسبة لكن بعد الكسم 2565.. قلتلوا هات الاستمارة بلا قبل الكسم بلا بعد الكسم وقلت في نفسي اذا كان كدا سعر الكمبروسر اجل قطع غيار السيارات التانية كم حيكون سعرها المهم خرجت من عنده ورحت على محل تاني وسألت البياع طلعت المصيبة اكبر انه سعر المحل التاني اغلى من الاول وخرجت من المحل ونا اضرب يداتي اخماس في اسداس وقلت بيني وبين نفسي عالم ذمتها واسعة كل واحد يبيع على كيفو وما عندك احد لا حسيب ولا رقيب ولا وزارة تجارة ولا حماية مستهلك ولا يحزنون عشان كدا رحت للتشليح اشوف كمبروسر مستعمل للسيارة وجلست الفلف مع العامل الين رجولي بققت من اللف والدوران وفي الاخير مالقيت كمبروسر.. طيب والحل ياسيدي ؟ والله ماني عارف.. وشوية تجي فتو وتقول فين استمارة السيارة يبويا ؟ ايش تبغي فيها لا يكون تبغي تسوقي السيارة ترى ما عندنا بنات يسوقوا سيارات ويكفينا الزحمة اللي بنشوفها في الشوارع.. لا يبويا لا ابغى اسوق ولا شي بس ابغى اسألك عن سعر الكمبروسر عند شركة برا المملكة تبيع وتشتري في قطع السيارات عن طريق النت وترسل الكمبروسر عن طريق البريد .. طيب كثر الله خيرهم وهادي الاستمارة .. وجلست فتو تطقطق على جهاز اللاب توب حقها وبعد شوية جاها الرد سعر الكمبروسر الاصلي ومن نفس الشركة 185 دولار ومع تكاليف الشحن 305 دولار وانا جالس جنبها مسكت الجوال وعلى الاله الحاسبة طلعت الحسبة كلها 1144 ريال سعودي لاغير وحبايبنا حقون قطع غيار السيارات الاصلية أو التجارية طايحين سلخ في عباد الله من جد ناس مفترية وما تخاف الله في الناس هدا وهما ما بيدفعوا لا جمارك ولا غيروا عشان كدا بقول ياتجار خافوا الله وارضوا بالقليل عشان ربنا يبارك لكم فيه وارحموا من في الارض يرحمكم من في السماء .. وعيشوا كتيييييير تشوفوا كتيييييير.