على فين كدا ياعم معتوق مصحصح من بدري ؟ على فين يعني متقاعد من سنة زي منت عارف ومافي نوم قلت ياواد روح أفطر .. بس اليوم جمعة ياعم معتوق على الاقل ترتاح في النوم طالما مافي مدارس .. يبو فتو ما عاد صارت تفرق عندي الايام طالما متقاعد وجالس لا شغلة ولا مهرة .. الله يعينك ويساعدك وفين حتفطرنا عشان نروح سوا ؟ طب كويس انك حتجي معايا على الاقل الواحد تنفتح نفسوو للأكل لما يكون أحد معاه وحنفطر ياسيدي عند واحد فوال في العمارية بس قبل ما نروح للفوال حنعدي نجيب العيش الحب من عند مخبز الشيخ يوسف شكري لانه السكر عامل عمايلوا فيا .. المهم حركنا بسيارة عم معتوق ووصلنا للفوال بعد ما أخدنا العيش الحب وجلسنا على طربيزة، وسمعت عم معتوق يقول للفوال اتنين فول بالسمن وكتر الشطيطة .. المهم بعد ما فطرنا جينا راجعين للبيت قلت لعم معتوق شكلوا جاتك هبرة كبيرة بعد ما خدمت في الحكومة 30 سنة ؟ هبرة كبيرة، ههههههه ضحكتني تصدق وتآمن بالله يبو فتو ما طلعت من خدمة 30 سنة إلا بتلاتة شهور راتب ومبلغ الإجازات اللي ما أخدتها أما خدمة الـ 30 سنة اللي خدمتها في الدولة راحت فطيس لكن لو الحبايب قلوبهم علينا كانوا حسبولنا مكافأة نهاية خدمة زي حالاتكم انتو يللي في القطاع الخاص كان طلع لنا حسبة طيبة نعرف نتصرف فيها ما بقي من حياتنا وعمرنا لكن كدا يطلعونا بلووشي بعد كد وتعب وشقى 30 سنة وزي منت عارف راتب التقاعد يا الله يكفي إيجار البيت ومصاريف الاولاد هدا غير انه ما عندنا تأمين طبي لا في أيام الوظيفة ولا دحين لما صرنا متقاعدين وانت عارف حال المستشفيات تسلخ سلخ ولا ترحم هدا غير انه كل شي يخطر في بالك ارتفع سعره ومافي أحد يحميك من جشع وطمع التجار، لكن السؤال اللي يسدح ويدردب نفسو وايش المانع انه يعطونا مكافأة نهاية خدمة زي ماهو حاصل في القطاع الخاص ويفرحونا بقرشين بعد خدمة 30 سنة نقدر بيها على الاقل نشتري شقة تسترنا ونعيش حياة كريمة نحنا وأولادنا والحمدلله وبفضل الله بلدنا فيها خير وهيه كريمة ونحنا نستاهل .. المهم وصلت للبيت وانا نازل من السيارة جات عيني في عيون عم معتوق لقيتها غرقانة دموع قلتلوا يا عم معتوق صلي على النبي واستهدي بالله وقول يارب وهية تفرج بإذن واحد احد .. عشان كدا بقول يا مجلس الشورى لجل الله دخيلكم ابوس راسكم دبروها وارحموا من في الأرض يرحمكم من في السماء.. وعيشوا كتيييييير تشوفوا كتيييييير.
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة