هااه ياسيدي بشر عسى الحبايب حقون المنتدى الاقتصادي شافوا لنا حل في حكاية السكن اللي هلكنا وهلك غيرنا من الغلابا ؟ والله ياستي علمي علمك بس هما لو عندهم نية انهم يشوفوا لنا حل في الحكاية دي كانوا دبروها من زمان. الحبايب حقون المنتدى الاقتصادي دا لهم سنين وسنين وهما بيجتمعوا وبيتكلموا على حكاية السكن ولما يومك هدا ما شفنا شي وكل اللي بنشوفه كلام جرايد وتصاريح وصور اجتماعات هدا غير الإعلانات التجارية عن بيع فلل بالتقسيط، مسكين المواطن الغلبان حيقسط ايه والا ايه إذا كانت حياتووا كلها ديون في ديون. كان نفسي انه حقون المنتدى الاقتصادى عزموا ناس من الغلابا اللي حكاية السكن دمرتهم ودمرت حياتهم ومستقبلهم عشان يتكلموا من جوة قلوبهم عن دي المشكلة اللي بيعانوا منها من سنوات طويلة وإلى اليوم ما انحلت مشاكلهم بخصوص السكن لكن للأسف هادول الغلابا ينطبق عليهم المثل الحجازي اللي بيقول (الشبعان ما يفت للجيعان) . الغلابا من الناس أصحاب الدخل المفقود الايجارات هلكتهم ودمرت حياتهم وكل سنة أصحاب العقارات اللي ماعندهم رحمة في عباد الله بيرفعوا الايجارات على خلق الله. شقق سكنية قديمة حالتها بالبلا والبلا لاحقها وصلت أسعارها لمبالغ ما تتخيلوها وكل صاحب عقار جالس يلعب في السوق على كيفوا وعذرهم (العقار حر ) ، هدا غير أسعار الأراضي اللي وصلت أسعارها داخل البلد وخارج البلد بملايين الريالات من فين حيجيب المواطن الغلبان قيمتها والله سبحانه وتعالى وحده عالم بحالوو ، عشان كدا بقول يا حبايبنا يللي في المنتدى الاقتصادي واللي كنتوا تتكلموا عن حكاية السكن المواطن الغلبان يبغى حلول للسكن أما هادي المؤتمرات والاجتماعات ما حياكل منها عيش، المواطن الغلبان يا أصحاب الملايين والمليارات يبغى سكن يستر نفسه وأهل بيته فيه والأراضي الحمد لله في البلد موجودة وعلى مد البصر وزعوها للغلابا ودخلوا فيها الخدمات عشان يبنوها والا ابنوها وقسطوها عليهم بأقساط ميسرة واستروهم في الدنيا عشان ربنا يستركم في الاخرة .. وعيشوا كتيييير تشوفوا كتيييييير.