كل عام وانتو بخير وعيدكم مبارك قبل الزحمة وأسأل الله سبحانه وتعالى أن يتقبل منا ومنكم الصيام والقيام ويعيد علينا شهر رمضان الكريم أعواما عديدة ونحنا وانتو بخير وعافية ولا أطول عليكم تعالوا ندخل في الهرجة كده على طول.
كنت ماشي كعابي ورايح على سوق باب مكة عشان أشتري بعض العازات في آخر ليلة من ليالي رمضان، وأنا ماشي في أمان الله إلا وأسمع صوت قنبلة شعترتني شعترة حتى أنه العمامة طاحت من راسي والنظارة انعوجت كمان وشويه أسمع صوت ضحك وكركرة وتعليقات من بعض الأطفال والشباب اللي يقول تخاف من طرطيعة يا جبان.. طرطيعة تسوي فيك كده ما رديت عليهم خصرتهم وجيت ماشي وأنا باتلفت يمين وشمال في المحلات إلاّ وأشوف واحد شاب يقرب جنبي ويقولي: طراطيع.. طراطيع
ما أعطيتو اهتمام ورجعلي تاني
وقالي لي: طراطيع .. طراطيع
ما تبغى طراطيع عشان بناتك وأولادك يفرحو بالعيد قلتله وماله نشتري طراطيع أنبسط الراجل وفرح وقال لي: هيا أمشي ورايا، ومشيت وراه من زقاق لزقاق ومن حارة لحارة الين وصلنا المكان اللي تنباع فيه الطراطيع (وأكيد إنتو عارفين محلها فين) إلا وأشوفلك عالم يا كترها تبيع وتشتري.. زبائن أطفال ورجال وحراج ما له أول ولا آخر وشي مو معقول، قال: بكم تبغى تشتري بـ1000 والا بـ2000 وايش الأنواع اللي تبغاها؟
كمان فيها أنواع؟ أيوه في أنواع كتيرة في الكبابة والهرم والنحلة والكمثرى والبطاريات وفحمات الصرصار والطلقات والشموس والكبريت ونجوم الليل وأنواع غيرها كتير قلتلو طيب أعطيني بس بـ10 ريال نجوم الليل، فرصع الراجل عيونه فيا ووجهه حمر والود وده يهفني ببوكس وقال لي بعد كل دي اللفلفة والدوران ومن حارة لحارة ومن زقاق لزقاق وتجي تقولي أعطيني بـ10 ريال لو سمحت وريني عرض اكتافك سوقك مو عندي شوفلك محل تاني، أخدت بعضي وجيت راجع من محل ماجيت، وأنا ماشي في الطريق قعدت أسأل نفسي أسئلة كتيرة: فين الرقابة على هادي المصايب اللي بتجي للبلد، ومين اللي بيسمح لها إنها تدخل، ومين المستفيد منها.. الطراطيع دي ياما سببت الحرايق في بعض البيوت وياما انحرقت بسببها الأيادي والأجسام والعيون، لكن ايش نقول أهل العقول في راحة، وعيشوا كتييييير تشوفوا كتييييير.
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة
abofatoo@hotmail.com
كنت ماشي كعابي ورايح على سوق باب مكة عشان أشتري بعض العازات في آخر ليلة من ليالي رمضان، وأنا ماشي في أمان الله إلا وأسمع صوت قنبلة شعترتني شعترة حتى أنه العمامة طاحت من راسي والنظارة انعوجت كمان وشويه أسمع صوت ضحك وكركرة وتعليقات من بعض الأطفال والشباب اللي يقول تخاف من طرطيعة يا جبان.. طرطيعة تسوي فيك كده ما رديت عليهم خصرتهم وجيت ماشي وأنا باتلفت يمين وشمال في المحلات إلاّ وأشوف واحد شاب يقرب جنبي ويقولي: طراطيع.. طراطيع
ما أعطيتو اهتمام ورجعلي تاني
وقالي لي: طراطيع .. طراطيع
ما تبغى طراطيع عشان بناتك وأولادك يفرحو بالعيد قلتله وماله نشتري طراطيع أنبسط الراجل وفرح وقال لي: هيا أمشي ورايا، ومشيت وراه من زقاق لزقاق ومن حارة لحارة الين وصلنا المكان اللي تنباع فيه الطراطيع (وأكيد إنتو عارفين محلها فين) إلا وأشوفلك عالم يا كترها تبيع وتشتري.. زبائن أطفال ورجال وحراج ما له أول ولا آخر وشي مو معقول، قال: بكم تبغى تشتري بـ1000 والا بـ2000 وايش الأنواع اللي تبغاها؟
كمان فيها أنواع؟ أيوه في أنواع كتيرة في الكبابة والهرم والنحلة والكمثرى والبطاريات وفحمات الصرصار والطلقات والشموس والكبريت ونجوم الليل وأنواع غيرها كتير قلتلو طيب أعطيني بس بـ10 ريال نجوم الليل، فرصع الراجل عيونه فيا ووجهه حمر والود وده يهفني ببوكس وقال لي بعد كل دي اللفلفة والدوران ومن حارة لحارة ومن زقاق لزقاق وتجي تقولي أعطيني بـ10 ريال لو سمحت وريني عرض اكتافك سوقك مو عندي شوفلك محل تاني، أخدت بعضي وجيت راجع من محل ماجيت، وأنا ماشي في الطريق قعدت أسأل نفسي أسئلة كتيرة: فين الرقابة على هادي المصايب اللي بتجي للبلد، ومين اللي بيسمح لها إنها تدخل، ومين المستفيد منها.. الطراطيع دي ياما سببت الحرايق في بعض البيوت وياما انحرقت بسببها الأيادي والأجسام والعيون، لكن ايش نقول أهل العقول في راحة، وعيشوا كتييييير تشوفوا كتييييير.
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة
abofatoo@hotmail.com