سلمولي على المنتخب

على فين كده ياسيدي معطر ومشمم ومبخر ؟ رايح للمطار واشوف اقرب طياره رايحه للرياض .. وي كده فجأة وعشان ايه لا عندك اقارب هناك ولا عندك معامله تراجع عشانها .. ابغى اروح للرياض عشان ابغى اقابل حبيبنا احمد عيد رئيس الاتحاد السعودي لكرة القدم واتفاهم معاه لانه اللي جالس بيصير من هادول اللعيبة اللي اختارهم المدرب للمنتخب ما ينسكت عليه صار منظرنا مخزي قدام العالم وصار ترتيبنا الاخير ببركة هادول اللعيبة اللي شايفين نفسهم الين متى ونحنا نجلس نعاتب ونتكلم ونهرج ونبرر، الين متى وهادول اللعيبة شايفين نفسهم ، الين متى حنجلس نبرر لهم وندلعهم اذا ما يبغوا يمثلوا بلدهم وينحرق دمهم وقلبهم على بلدهم ويلعبوا زي بقية المنتخبات التانية اللي بتشرف بلادها يبعدوا ويفكونا شرهم ويستريحوا ويريحوا لانه حرام هادي الملايين من الدولارات اللي بتصرف عليهم من معسكرات ومدربين وفي الاخير ينغلبوا من منتخب ما عنده لا انجازات ولا بطولات وبتلاته اهداف محترمه والمصيبة لما تسمع تصريحاتهم وتبريراتهم يقولك المدرب ما حط التشكيلة المناسبة أي تشكيله واي خرابيط اللاعب فيكم له سنوات وسنوات وهو بيلعب كوره مافي واحد فيكم بخبرته الكروية يقوم بتنظيم الفريق وتقدموا كوره صح تفرحوا فيها شعبكم وبلدكم .. عيب يالعيبة المنتخب عييب هدا اللي بتسوه فينا، ما حنقبل منكم كل التبريرات وكل التصاريح اللي حتقولوها ولا حنقبل منكم الاعذار اللي بنسمعاها منكم بعد كل مباراه لاننا طفشنا من اعذاركم وتصاريحكم التافهه ، حلوقنا انبحت ونحنا نصرخ ونزعق على تشجيعكم ، ايادينا نشفت ونحنا بنصفق لكم ، قلوبنا تعبت من تشجيعكم ، ضغطنا وسكرنا طلع ونزل من مستواكم التعيس والتعبان في مبارياتكم ، حتى البطولة الدولية الودية اللي تعشمنا فيكم انكم تجيبوا كاسها وبطولتها تخرجوا منها بهدا الشكل المخزي وفي الترتيب الاخير .. ايش اللي ناقصكم والدولة الله يحفظها ما قصرت معاكم كل شي متوفر لكم معسكرات في كل البلدان حتى الاحتراف اللي طبقوه عليكم اصلا انتوا ما تستاهلوه لانه ما يستاهل الاحتراف الا اللعيبة اللي يبيضوا الوجه لبلدهم اما انتو حرام فيكم الاحتراف اللي بتلهفوا منه ملاييين وصدق الدكتور صالح بن ناصر لما قال بالفم المليان اللاعب السعودي قيمته مليون ريال وبس وصدقني يادكتور صالح مليون ريال كتيييره فيهم ، ياخساره ومليون خساره على حال منتخبنا والمصيبة انه هادول اللعيبة بيتشطروا على بعض في مباريات الدوري تلاقيهم متحمسين ويلعبوا من قلوبهم اما منتخب بلدهم ولا ينحرق قلبهم عليه يقدموا فيه اسوأ المباريات عشان كده بتمنى من اتحاد الكره انه يخصم من مستحقاتهم المليونية عن كل مباراه للمنتخب يقدموا فيها مستويات ما ترضي بلدنا وشعبنا لانه اللي جالس بيصير للمنتخب وللبلد من هادول اللعيبة شي مخزي لسمعة الكرة السعودية وعيشوا كتيييييير تشوفوا كتيييييير.
هرجة: الاحتراف عندنا حكاية اسمها امسكلي واقطعلك..