سامحني ياطويل العمر إن كان كلامي معاك باللغة العامية الدارجة لكن إيش أسوي هدا أسلوبي في الكتابة في الحبيبة «عكاظ» من 13 سنة. يا طويل العمر بما أنه سيدي خادم الحرمين الشريفين ــ حفظه الله ــ اختارك لتكون وزيرا للتربية والتعليم أبارك لسموكم هدا المنصب الجليل وأسأل الله سبحانه وتعالى أن يعينك ويساعدك على تولي هادي المسوؤلية العظيمة، وتاني شيء بما أنك صرت وزير للتربية والتعليم نبغى منك قرار باعتماد اللغة الإنجليزية من الصف الأول الابتدائي لأنه اللي حاصل في بعض مدارسنا في الوقت الحاضر إنهم معتمدين اللغة الإنجليزية من الصف الرابع الابتدائي، طب ليش من الصف الرابع الابتدائي؟ إيش المانع إنه الإنجليزي يدرس في كل مدارسنا من الصف الأول الابتدائي على الأقل يستفيد الطفل استفادة كبيرة من الإنجليزي طالما هوه لسه صغير في السن وتكبر سنوات عمره ويكبر معاه فهمه وإدراكه للإنجليزي وبعد كده ما يوصل للمرحلة المتوسطة إلا وهوه يعرف يقرأ ويعرف يكتب ويعرف يتكلم ولما يوصلوا للمرحلة الثانوية يكونوا فاهمين ومتمكنين من المادة عشان كده بقول ليش نحرم أطفالنا من تعليمهم للغة عالمية بيستخدمها كل البشر في أغلب دول العالم لأنها لغة عالمية. ياطويل العمر مستويات طلابنا بالنسبة للغة الإنجليزية في المدارس الحكومية مستويات يندى لها الجبين طلاب وطالبات ما يعرفوا يقروا ولا يعرفوا يكتبوا ولا يعرفوا يهرجوا كمان والأهم من ده كله انهم بيخافوا من مادة اسمها الإنجليزي ليش ما أعرف رغم انها مادة سهلة ومحد عارف فين الخلل ومين السبب هما الطلاب بحجة إنهم متخوفين من المادة أو من بعض حبايبنا من المعلمين والمعلمات اللي مو قادرين يوصلوا المعلومة للطلاب والطالبات، والمصيبة مو هنا كمان يا طويل العمر المصيبة في طلاب الجامعات اللي كمان مستوياتهم في اللغة الإنجليزية (مشي حالك) هدا غير المتخرجين والمتخرجات من جامعتنا ويبتعثوا للدراسة في الخارج حالهم نص ونص في الإنجليزي والدليل إنهم بيدرسوا سنة إنجليزي قبل ما يدخلوا في دراسة التخصص اللي يرغبوه، عشان كده يا طويل العمر نتمنى إنكم تعتمدوا اللغة الإنجليزية من الصف الأول الابتدائي عشان يكبر الطفل وتكبر معاه المادة يستوعبها تمام ويعرف يقرأ ويعرف يكتب ويعرف يهرج والأهم من ده كلوو لازم يكون في مدارسنا معامل لمادة اللغة الإنجليزية زي ما كان موجود في مدارسنا قبل 25 سنة، ياريت يا طويل العمر تعتمدوا اللغة الإنجليزية في المراحل الإولية ومن الصف الأول الابتدائي من التعليم، والحمدلله وبفضل الله الدولة ما بتقصر في ميزانية التعليم والحمد لله الخريجين والخريجات من قسم اللغة الإنجليزية في بلدي بالكووم عينوهم في المدارس وبحول الله حنجني ثمار تعليم الإنجليزي لطلابنا وطالباتنا بعد فترة وجيزة إن شاء الله. وعيشوا كتيييييير تشوفوا كتيييييير.