ليل الفراق

احيان اخاف الجفا.. واحيان ما خفته

واليوم مدري من اللي خوف الثاني

يا طول ليل الفراق وطول سالفته

دمع.. وعذاب.. وثمان ابيات.. واغاني

ما كنت ندمان.. اني كنت والفته

يكفيني انه بكى مرة على شاني

ما طاح غير الحنين ولا تكلفته

يومه خذلني وانا قدامه اعاني

الله معه / وان طلبني صبر سلفته

بعطيه ما ينصف المجني من الجاني

غاب وصحى القلب عند حدود معرفته

واخذت لي غفوة من كل وجداني

ما فيه شي بعد ما غاب ما شفته

شفته بعد هو لكنه تعداني

البعد مخلوق عاطل بس وظفته

واعطيته اجمل تفاصيلي وخلاني

ليت الزمان يتوقف.. كان وقفته

على طفولة هواي ومولد اشجاني

ويعيش ما شافني واعيش ما شفته

واكون من بيت ابوي لبيت جداني