يا مرحبا بك

يا مرحبـــا بــك يا ثمـــانين عمري

لو ما هقـيت انّي اشوفـك وانا حَيْ

تَنَاَسَـلَـتْ شَعــرات الايام تجـري

وابيضَّـتْ السّودا على ضـامي الرَّي

الشَّمس تمضي وانْجُم الليل تسري

وكلْ شيٍ صار في عيني شـوَي

أبحث عن اللي يرفَع الرّاس واشري

ما اشْغَلْـت نفسـي بالمَلـذّات والغَي

أشْغَلتْ وقتي واستفَـزيت عصري

أصَحّي الغفوات بالشمـس والفَي

اغضي.. ولكن ما تَناقَصْـتْ قدري

وأسْمَـحْ.. ولكن ما تنازَلت عن شي

رُمْـتْ المراَجـلْ طفلْ لكنّي ادري

إنّي أَبَطْـوي كــلّ عَسْـراتها طَي

دَرَسْـتْ علم الفكر والعـزّ بـدري

في مدرسـة جدّي وابوي وعَمامي

واليـوم لو ثَقْلَتْ بي الرّجِـل.. بُصْري

لي عـزمٍ امشـي به على كلْما في

أَمَاوِجْ المعنى على بحر شعـري

والْوي قوافيها على شْـراعـها لَي

هيْ سَلْوِتي بالعمرْ إذا ضاق صدري

أداوي جـروحي قَبـلْ حامي الكَي